ক্ৰিকেটৰ সৈতে কি গভীৰ সম্পৰ্ক কেতন আগৰৱালা হত্যাৰ অভিযুক্ত ছিয়া আৰু চেতনৰ?

পুনেৰ ব্যৱসায়ী কেতন আগৰৱালাৰ হত্যাকাণ্ডৰ মূল অভিযুক্ত ছিয়া গোৱেল আৰু চেতন চৌধুৰীৰ ক্ৰিকেটৰ সৈতে গভীৰ সম্পৰ্ক আছে। তদন্তকাৰীয়ে দাবী কৰিছে যে অভিযুক্ত ছিয়া আৰু চেতনৰ চিনাকি ক্ৰিকেট খেলপথাৰৰ পৰাই আৰম্ভ হৈছিল। ছিয়াৰ ককায়েক সাহিল গোৱেলৰ জৰিয়তে চেতনক লগ পোৱা বুলি আৰক্ষীয়ে অনুমান কৰিছে।

তদন্তকাৰী সূত্ৰই দাবী কৰিছে যে চেতন এজন ক্ৰিকেট খেলুৱৈ আৰু পূৰ্বে সাহিল গোৱেলৰ সৈতে কেইবাখনো মেচ খেলিছে। সেই সময়ত ছিয়াও ককায়েকৰ লগত খেল চাবলৈ খেলপথাৰলৈ গৈছিল। ধাৰণা কৰা হয় যে তেওঁলোকৰ প্ৰথম চিনাকি তাতেই হৈছিল। পিছলৈ ২০২৫ চনত দীপাৱলীৰ সময়ত চিনাকিৰ মানুহৰ পাৰ্টিত পুনৰ লগ হৈছিল আৰু তাৰ পিছত ক্ৰমান্বয়ে দুয়োৰে মাজত ঘনিষ্ঠতা বাঢ়িছিল।

তদন্তকাৰীয়ে দাবী কৰিছে যে ছিয়াৰ পৰিয়ালে এই বিষয়ে জানিব পাৰি তেওঁলোকৰ সম্পৰ্ক নাকচ কৰিছিল। তেওঁলোকৰ দৃষ্টিত চেতন ছিয়াৰ বাবে একেবাৰে উপযুক্ত নাছিল। অভিযোগ অনুসৰি, আৰ্থিক অৱস্থাৰ পাৰ্থক্য বিবেচনা কৰি ব্যৱসায়ী পৰিয়ালৰ পুত্ৰ কেতন আগৰৱালাৰ সৈতে পৰিয়ালটোৱে ছিয়াৰ বিবাহৰ ব্যৱস্থা কৰিছিল। ড্ৰাই ফ্ৰুটছ ব্যৱসায়তো গোৱেল পৰিয়ালৰ যথেষ্ট প্ৰতিপত্তি আছে।

আৰক্ষীয়ে লাভ কৰা কল ডিটেইল ৰেকৰ্ড (চিডিআৰ) অনুসৰি চলিত বৰ্ষৰ জানুৱাৰী মাহৰ পৰা ছিয়া আৰু চেতনে ২০০৪ বাৰ ফোনত কথা পাতিছিল। তদন্তকাৰীয়ে দাবী কৰিছে যে এই কথা-বতৰাৰ মুঠ সময় আছিল প্ৰায় ২৩৮ ঘণ্টা। এই তথ্যসমূহ গুৰুত্বসহকাৰে পৰীক্ষা কৰা হৈছে। তেওঁলোকৰ চ্যাটবোৰো আৰক্ষীৰ দৃষ্টিত আছে।

ইফালে শুকুৰবাৰে ছিয়াৰ ভাতৃ সাহিল গোৱেলক প্ৰায় ১০ ঘণ্টা ধৰি সোধা-পোছা কৰা হয়। ছিয়া আৰু চেতনৰ সম্পৰ্কৰ বিষয়ে পৰিয়ালটোৱে কিমান জানিছিল বুলি প্ৰশ্ন কৰিছে আৰক্ষীয়ে। সাহিলে কয় যে যদি ছিয়াই বিয়া হ’ব নিবিচাৰে বুলি আগতেই জনাই দিলেহেঁতেন তেন্তে পৰিয়ালে বিয়া বন্ধ কৰি দিলেহেঁতেন।

তদন্তত অধিক ডিজিটেল প্ৰমাণ অতি গুৰুত্বপূৰ্ণ। আৰক্ষীয়ে দাবী কৰিছে যে অভিযুক্তই মোবাইলৰ পৰা হোৱাটছএপ চ্যাট, ইনষ্টাগ্ৰামৰ কথোপকথন আৰু অন্যান্য তথ্য ডিলিট কৰিছিল। অভিযোগ অনুসৰি ডিলিট কৰা ফোল্ডাৰটোও মচি পেলোৱা হৈছিল। এতিয়া ফৰেনছিক টিমে সেই তথ্য উদ্ধাৰৰ চেষ্টা চলাইছে।

১৭ জুনত পুনেৰ লুল্লানগৰ অঞ্চলৰ এখন কেফেত ছিয়া আৰু চেতনৰ সাক্ষাৎ হোৱাৰ কথাও তদন্তকাৰীৰ দৃষ্টিগোচৰ হৈছে। লোহাগড় দুৰ্গ হত্যাকাণ্ডৰ পৰিকল্পনা তাতেই আছিল নে নাই তাক লৈও তদন্ত চলি আছে। ১৮ জুনত লোহাগড় দুৰ্গৰ খাৱৈত পৰি মৃত্যু হৈছল কেতন আগৰৱালৰ।