নিহত ফটো সাংবাদিক ডেনিছ চিদ্দিকীকে ধৰি ৪ জন ভাৰতীয়ই লাভ কৰিলে পুলিৎজাৰ বঁটা
আফগানিস্তানত নিহত হোৱা ফটো সাংবাদিক ডেনিছ চিদ্দিকীকে ধৰি চাৰিজন ভাৰতীয়ক পুলিৎজাৰ বঁটা প্ৰদান কৰা হৈছে। সোমবাৰে এই বঁটাৰ বাবে ৰয়টাৰৰ ডেনিছ আৰু তেওঁৰ সহকৰ্মী আদনান আবিদি, ছানা ইৰশাদ মাট্টু আৰু অমিত ডেভৰ নাম ঘোষণা কৰা হয়।
লছ এঞ্জেলছ টাইমছৰ মাৰ্কাছ য়ামে ব্ৰেকিং নিউজ ফটোগ্ৰাফী শাখাত শ্ৰেষ্ঠ বঁটা লাভ কৰিছে।
পুলিৎজাৰ বঁটা ৱেবছাইটত জানিবলৈ দিয়া মতে কোভিডৰ সময়ত ভাৰতৰ দুৰ্দশাৰ দৃশ্যৰ বাবে মৰণোত্তৰভাৱে ডেনিছৰ পৰিয়ালক এই বঁটা প্ৰদান কৰা হৈছে।
যোৱা বছৰ আফগানিস্তানত তালিবানৰ আক্ৰমণৰ সময়ত ৩৮ বছৰীয়া ডেনিছ নিহত হৈছিল। বহুতো সন্মান লাভ কৰা ডেনিছে যোৱা বছৰ কান্দাহাৰৰ স্পিন বোল্ডাত আফগানসকলৰ সৈতে তালিবানৰ যুদ্ধৰ মাজত সোমাই পৰি প্ৰাণ হেৰুৱাইছিল।
ডেনিছে দ্বিতীয়বাৰৰ বাবে এই পুলিৎজাৰ বঁটা লাভ কৰিছে। তেওঁ ২০১৮ চনত তেওঁ এই বহু সন্মানীয় বঁটাটো লাভ কৰিছিল। ৰয়টাৰ্ছৰ দলটোক ৰহিংগীয়া সংকটৰ ফটোৰ বাবে বঁটা প্ৰদান কৰা হৈছিল। ডেনিছো সেই দলটোত আছিল।
তেওঁ আফগানিস্তান সংঘৰ্ষ, হংকঙৰ প্ৰতিবাদকে ধৰি এছিয়া, মধ্য প্ৰাচ্য আৰু ইউৰোপৰ বহুতো ঘটনা কেমেৰাত বন্দী কৰিছিল।
জামিয়া-মিলিয়া ইছলামিয়া বিশ্ববিদ্যালয়ৰ পৰা অৰ্থনীতিত ডিগ্ৰী লাভ কৰা ডেনিছে জামিয়াৰ এজেকে মাছ কমিউনিকেশ্যন ৰিচাৰ্ছৰ পৰা সাংবাদিকতাৰ ডিগ্ৰী লৈছিল।
এজন টিভি সাংবাদিক হিচাপে ডেনিছে তেওঁৰ কেৰিয়াৰআৰম্ভ কৰিছিল যদিও পিছত ২০১০ চনত ফটো সাংবাদিক হিচাপে ৰয়টাৰ্ছত যোগদান কৰিছিল।
উল্লেখ্য যে হাংগেৰিয়ান-আমেৰিকান সাংবাদিক যোচেফ পুলিৎজাৰৰ নামত বছৰি পুলিৎজাৰ বঁটা প্ৰদান কৰা হয়। ১৯১১ চনত তেওঁৰ মৃত্যুৰ আগতে, তেওঁ তেওঁৰ সকলো সঞ্চয় কলম্বিয়া বিশ্ববিদ্যালয়লৈ দান কৰিছিল। পৰৱৰ্তী বছৰত, তেওঁৰ সঞ্চয়ৰ এটা অংশৰে স্কুল অৱ জাৰ্নালিজম গঢ়ি তোলা হয় আৰু তেওঁৰ নামেৰে পুলিৎজাৰ বঁটা প্ৰতিষ্ঠা কৰা হয়। প্ৰথমবাৰৰ বাবে ১৯১৭ চনত এই বঁটা প্ৰদান কৰা হৈছিল।