অস্তিত্বৰ সংকটত মহানগৰীৰ মাজ মজিয়াৰ এখন ঐতিহ্য বহনকাৰী বিদ্যালয়

ব্ৰিটিছৰ শাসনৰ সময়তে অৰ্থ্যাৎ ১৮৯৪ চনতে স্থাপিত বহু ঐতিহ্যৰ সাক্ষ্য বহন কৰি অহা মহানগৰীৰ এখন বিদ্যালয়। কিন্তু চৰকাৰৰ অৱহেলাৰ বাবেই বৰ্তমান অস্তিত্বৰ সংকটত ভুগিছে ঐতিহ্য বহনকাৰী এই বিদ্যালয়খন।

গুৱাহাটীৰ ভৰলুস্থিত বিদ্যালয়খনৰ নাম সোণাৰাম উচ্চতৰ মাধ্যমিক বিদ্যালয়। বিদ্যালয়খন শিক্ষা মন্ত্ৰী সিদ্ধাৰ্থ ভট্টাচাৰ্য্যৰ সমষ্টিৰ অন্তৰ্গত যদিও বিদ্যালয়খনৰ আন্তঃগাঁথনি তেনেই তথৈবচ।

উল্লেখযোগ্য যে, স্বাধীনোত্তৰ কালৰ অসমৰ প্ৰথম মুখ্য মন্ত্ৰী গোপীনাথ বৰদলৈয়ো অধ্যক্ষ হিচাপে কাৰ্য্যনিৰ্বাহ কৰিছিল এই বিদ্যালয়খনত।

আনকি সুধাকন্ঠ ড০ ভূপেন হাজৰিকা, বিহগী কবি ৰঘুনাথ চৌধুৰী, অসম কেশৰী অম্বিকাগিৰী ৰায় চৌধুৰী, দেশভক্ত তৰুণৰাম ফুকনে অধ্যয়ন কৰিছিল এই বিদ্যালয়ত।

প্ৰায় ১০০ বছৰ পুৰণি শ্ৰেণীকোঠাতে বিদ্যালয়ৰ ছাত্ৰ-ছাত্ৰীসকলে শিক্ষাগ্ৰহণ কৰিবলগীয়া হৈছে। বিদ্যালয়খনৰ অধিকসংখ্যক শ্ৰেণীকোঠাতে বৰষুণ দিলে পানী পৰাৰ লগতে পাঠদান কৰি থকাৰ সময়তে চিমেন্টৰ টুকুৰা ওপৰৰ চাদৰ পৰা খহি পৰে বুলি জানিবলৈ দিয়ে বিদ্যালয়খনৰ অধ্যক্ষা মঞ্জু ৰাণী বৰ্মণে।

‘’তাহানিতে যিকেইটা গৃহ নিৰ্মাণ কৰা হৈছিল, সেইকেইটাতে বৰ্তমানো ছাত্ৰ-ছাত্ৰীয়ে শিক্ষা গ্ৰহণ কৰি আছে। গোটেইকেইটা কোঠাৰে অৱস্থা জহি-খহি যোৱা। ক্লাছ কৰি থাকোঁতে বৰষুণ আহিলে পানী পৰে আৰু চিলিঙৰ পৰা চিমেন্টৰ টুকুৰা খহি পৰে। চৰকাৰৰ ফালৰ পৰা ধনৰ আৱন্টন হ’ব বুলি শুনি আছো যদিও কোনো ধন আন্তঃগাঁথনি নিৰ্মাণৰ নামত দিয়া হোৱা নাই।‘’ নৰ্থ ইষ্ট নাওৰ সৈতে হোৱা কথা-বতৰাত বিদ্যালয়খনৰ অধ্যক্ষাই এইদৰে কয়।

ইপিনে, বিদ্যালয়খনৰ অধ্যক্ষাগৰাকীয়ে নিজা প্ৰচেষ্টাৰে বিদ্যালয়খনৰ উন্নয়নৰ বাবে কিছু কামকাজ কৰাৰ লগতে স্থানীয় ৰাইজ, ব্যক্তিগত সংস্থাই বিদ্যালয়খনলৈ সহায়ৰ হাত আগবঢ়োৱা বুলি উল্লেখ কৰে।

‘’চৰকাৰৰ ফালৰ পৰা ধন অহা নাই যদিও মই ৰৈ থকা নাই। বিদ্যালয়খনৰ বাৰাণ্ডাৰ টিং ফুটি পানী পৰাত ভৰলুমুখৰ দুৰ্গা মন্দিৰ সমিতিক মই আবেদন জনোৱাত তেওঁলোকে বিদ্যালয়ৰ বাৰাণ্ডাৰ টিং নতুনকৈ লগাই দিছিল। আগৰৱালা সখী নামৰ মাৰোৱাৰী সংগঠনে পানী খাবৰ বাবে একুৱাগাৰ্ড এটাৰ লগতে চাৰিখন ফেন দিছে তথা কিছুমান এনজিঅ’ই আমাৰ বিদ্যালয়খনলৈ সহায়ৰ হাত আগবঢ়াইছে।‘’ অধ্যক্ষাই আমাৰ সাংবাদিকৰ আগত কয়।

চৰকাৰৰ বিয়াগোম শিক্ষা বিভাগটো থকাৰ পাছতো এনেদৰে ৰাইজৰ ধনেৰে চৰকাৰী বিদ্যালয়খন মেৰামতি কৰিবলগীয়া হোৱা কথাটোৱে শিক্ষা বিভাগৰ নিশকতীয়া ছবিখন পৰিস্ফুত কৰিছে।

অৱশ্যে, এই ঐতিহ্য বহনকাৰী বিদ্যালয়খন প্ৰস্তাৱিত স্মাৰ্ট চিটীৰ অন্তৰ্গত কৰিব বুলি ৰাজ্য চৰকাৰে আশ্বাস দিছে যদিও সেয়া বৰ্তমানো হৈ উঠা নাই।

ইপিনে, মনমোহন সিং প্ৰধান মন্ত্ৰী হৈ থকাৰ সময়তে বিদ্যালয়খনত এটি ক্ৰীড়া গৃহ স্থাপনৰ কাম আৰম্ভ হৈছিল যদিও আজি পৰ্য্যন্ত সম্পূৰ্ণ নহ’ল নিৰ্মাণৰ কাম। বিদ্যালয়খনৰ পাছফালে এলাগী হৈ পৰি ৰৈছে গৃহটি।

বহু গুণী জ্ঞানী ব্যক্তিৰ ঐতিহ্য বিজড়িত চৰকাৰী খণ্ডৰ এই বিদ্যালয়ক কিয় ৰাজ্য চৰকাৰে এই অৱস্থাৰ মাজলৈ থেলি দিছে সেয়া বৰ্তমানো ৰহস্যৰ আৱৰ্তত।