উৎকোচৰ গোচৰত দোষী সাৱ্যস্ত; এচিএছ বিষয়া নন্দিতা কোঁৱৰক ৪ বছৰৰ সশ্ৰম কাৰাদণ্ড

উৎকোচ লোৱাৰ এক অভিযোগত দোষী সাব্যস্ত কৰা হৈছে এচিএছ বিষয়া নন্দিতা কোঁৱৰক ৷ গুৱাহাটীৰ এখন বিশেষ আদালতে  শাস্তি হিচাপে এচিএছ বিষয়া গৰাকীক ৪ বছৰৰ সশ্ৰম কাৰাদণ্ড ঘোষণা কৰিছে।

তদুপৰি, আন এটা ধাৰাতো নন্দিতা কোঁৱৰক ৩ বছৰৰ কাৰাদণ্ডৰ নিৰ্দেশ দিছে আদালতখনে।

উল্লেখ্য যে, DRDA ৰ প্ৰকল্প সঞ্চালক হিচাপে কাৰ্যনিৰ্বাহ কৰি থকা নন্দিতা কোঁৱৰে এগৰাকী ঠিকাদাৰৰ পৰা ২০ হাজাৰ টকা উৎকোচ লোৱাৰ সময়তে অসম আৰক্ষীৰ তদাৰক আৰু দুৰ্নীতি নিবাৰক শাখাই হাতে-লোতে আটক কৰিছিল বিষয়াগৰাকীক।

বিহাৰ আৰু ত্ৰিপুৰাৰ প্ৰাক্তন ৰাজ্যপাল প্ৰয়াত দেবানন্দ কোঁৱৰৰ কন্যা হৈছে নন্দিতা কোঁৱৰ।

অসম অসমাৰিক সেৱাৰ বিষয়াগৰাকীয়ে কামৰূপ মহানগৰ জিলাৰ ডিআৰডিএৰ প্ৰকল্প সঞ্চালক হিচাপে থকা সময়তে যোৱা ২০১৫চনৰ অক্টোবৰত উৎকোচ লোৱাৰ অভিযোগত গ্ৰেপ্তাৰ কৰা হৈছিল।

নন্দিতা কোঁৱৰে মহানগৰীৰ দুৰ্গা সৰোবৰ অঞ্চলত সংসদ পুঁজিৰ অধীনত এটা পথ নিৰ্মাণৰ কামৰ বাবে এজন ঠিকাদাৰৰ পৰা ২০,০০০টকা উৎকোচ লৈছিল।

বিষয়াগৰাকীক দুৰ্নীতি নিবাৰণ আইন (চি পি) ১৯৮৮ৰ ধাৰা ৭,১৩((১) ৯ডি) আৰু ১৩(২)ৰ অধীনত গ্ৰেপ্তাৰ কৰি বিশেষ আদালতত হাজিৰ কৰোৱাৰ পাছত ন্যায়িক জিম্মালৈ প্ৰেৰণ কৰা হৈছিল।