ডিমৌত ৰাস্তাৰ মাজত ফটকা ফুটাই থকা যুৱকক মহতিয়াই নিলে বাহনে

দেওবাৰে নিশা শিৱসাগৰৰ ডিমৌত এক ভয়ংকৰ পথ দুৰ্ঘটনা সংঘটিত হয়। দীপাৱলীৰ ফটকা ফুটাই থকা অৱস্থাতে সংঘটিত উক্ত দুৰ্ঘটনাটোত এজন যুৱক গুৰুতৰভাৱে আহত হয়।

ইফালে দুৰ্ঘটনা সংঘটিত কৰা গাড়ীখনৰ চালক সুশীল বড়াক ৰাইজে উত্তম মাধ্যম সোধায়। বৰ্তমান ডিব্ৰুগড় মেডিকেল কলেজত ভৰ্তি হৈ থকা সুশীলৰ অৱস্থা সংকটজনক বুলি জানিব পৰা গৈছে।

দুৰ্ঘটনাৰ সময়ত তাত উপস্থিত এজন লোকৰ মোবাইলত বন্দী হৈ থকা দৃশ্যত দেখিবলৈ পোৱা যায় যে ডিমৌৰ দিহিং পথত  এজন যুৱকে ফটকা ফুটাই আছিল, ঠিক সেই সময়তে তেওঁক এখন গাড়ীয়ে খুন্দিয়াই থৈ যায়।

আঘাতপ্ৰাপ্ত যুৱকজনক সেই অঞ্চলৰে সমীৰ বুলি চিনাক্ত কৰা হৈছে। সমীৰ বৰ্তমান ডিমৌ আদৰ্শ চিকিৎসালয়ত চিকিৎসাধীন হৈ আছে। আনহাতে তেওঁক খুন্দিয়াই থৈ যোৱা বাহনখনৰ নম্বৰ হৈছে এ এছ-০১এ জে ৯৬১৬।