শ্ৰীভূমিত তলাবন্ধ ঘৰৰ ভিতৰত মহিলাৰ মৃতদেহ উদ্ধাৰ: আত্মীয়ৰ বিৰুদ্ধে গুৰুতৰ অভিযোগ

শ্ৰীভূমিৰ নীলমণি পথৰ এটা বাসগৃহত এগৰাকী প্ৰায় ৬০ বছৰীয়া মহিলাৰ মৃতদেহ আবদ্ধ অৱস্থাত উদ্ধাৰ হোৱা ঘটনাই অঞ্চলটোত তীব্ৰ চাঞ্চল্য আৰু ক্ষোভৰ সৃষ্টি কৰিছে। মঙলবাৰে (১৬ ডিচেম্বৰ) পুৱা সংঘটিত এই ঘটনাৰ পিছতে স্থানীয় ৰাইজ স্তম্ভিত হৈ পৰে।

মৃত মহিলাগৰাকীৰ নাম শ্ৰেয়াসী ৰায় বুলি চিনাক্ত কৰা হৈছে। স্থানীয় লোকৰ মতে, মহিলাগৰাকী মানসিকভাৱে অসুস্থ আছিল। অভিযোগ উত্থাপিত হৈছে যে শ্ৰেয়াসী ৰায়ৰ মৃত্যুৰ পিছত তেওঁৰ কেইজনমান আত্মীয়ই ঘৰলৈ আহি ধৰ্মীয় আচাৰ সম্পন্ন কৰাৰ দোহাই দি মৃতদেহৰ চকুত তুলসীপাত লগাই থৈ যায়। কিন্তু আচৰিত ধৰণে তেওঁলোকে মৃতদেহটো সৎকাৰ নকৰি ঘৰৰ বাহিৰত তলা ওলোমাই চৌহদ এৰি গুচি যায়।

নিশালৈকে মৃতদেহটো তলাবন্ধ ঘৰৰ ভিতৰতে পৰি থকাৰ বাবে চুবুৰীয়াসকলৰ মাজত আতংক আৰু সন্দেহৰ সৃষ্টি হয়। অৱশেষত স্থানীয় ৰাইজে আৰক্ষীক খবৰ দিয়ে। তথ্য লাভ কৰাৰ লগে লগে আৰক্ষীৰ এটা দল ঘটনাস্থলীত উপস্থিত হৈ ঘৰৰ তলা ভাঙি ভিতৰত প্ৰৱেশ কৰে আৰু মৃতদেহটো উদ্ধাৰ কৰে।

উদ্ধাৰ কৰা মৃতদেহটো মৰণোত্তৰ পৰীক্ষা আৰু পৰৱৰ্তী আইনী প্ৰক্ৰিয়াৰ বাবে শ্ৰীভূমি অসামৰিক চিকিৎসালয়লৈ প্ৰেৰণ কৰা হৈছে। মৃতকৰ আত্মীয়ৰ এনে অস্বাভাৱিক আৰু ৰহস্যজনক আচৰণে অঞ্চলটোত ব্যাপক ক্ষোভৰ সৃষ্টি কৰিছে।

ইফালে, আৰক্ষীয়ে সমগ্ৰ ঘটনাটোৰ সন্দৰ্ভত এটা গোচৰ ৰুজু কৰি তদন্ত আৰম্ভ কৰিছে। মৃত্যুৰ প্ৰকৃত কাৰণ আৰু আত্মীয়সকলৰ ৰহস্যজনক ভূমিকাৰ বিষয়ে আৰক্ষীয়ে বৰ্তমান অনুসন্ধান চলাই আছে।