ৰন্ধন গেছৰ যোগান অব্যাহত ৰাখিবলৈ চৰকাৰৰ প্রয়োজনীয় পদক্ষেপ গ্ৰহণ
ৰান্ধন গেছৰ চিলিণ্ডাৰৰ যোগান অব্যাহত ৰাখিবলৈ চৰকাৰে প্ৰয়োজনীয় পদক্ষেপ গ্ৰহণ কৰিছে। বিগত ৮ ছেপ্টেম্বৰৰ পৰা উত্তৰ-পূৰ্বীয় ৰন্ধনগেছ পৰিবহণ সংস্থাই তেওঁলোকৰ বিভিন্ন দাবীৰ সমৰ্থনত ৰন্ধন গেছ পৰিবহণ বন্ধ ৰখাৰ পৰিপ্ৰেক্ষিতত অসমৰ খাদ্য, অসামৰিক যোগান আৰু গ্ৰাহক পৰিক্ৰমা বিভাগৰ প্ৰধান সচিবে ভাৰতীয় তেল নিগমৰ উচ্চ পৰ্যায়ৰ বিষয়াসকলৰ সৈতে এখন আলোচনাত মিলিত হৈ সন্থাই উত্থাপন কৰা বিষয়টোৰ ওপৰত আলোচনা কৰে।
এই সন্দৰ্ভত ল’বলগীয়া পদক্ষেপৰ বিষয়ে অসম আৰক্ষীৰ সঞ্চালক প্ৰধানক অৱগত কৰি কামৰূপ, তিনিচুকীয়া, কাচাৰ, চিৰাং আৰু ডিব্ৰুগড়ৰ আৰক্ষী অধীক্ষকসকললৈ প্ৰয়োজনীয় নিৰ্দেশনা প্ৰেৰণ কৰা হৈছে। নিৰ্দেশনাটোত নিজৰ নিজৰ এক্তিয়াৰৰ অন্তৰ্গত এলেকাসমূহত থকা প্ৰৱেশপথত ৰন্ধন গেছৰ গাড়ী, কৰ্মচাৰী, কৰ্মী আদিয়ে যাতে বাধাহীনভাৱে অহা-যোৱা কৰিব পাৰে তাক নিশ্চিত কৰাৰ নিৰ্দেশ প্ৰদান কৰা হৈছে।
তাৰোপৰি, ৰন্ধন গেছৰ চিলিণ্ডাৰসমূহ গ্ৰাহকক যোগান ধৰাৰ সময়ত আইন-কানুনগত পৰিস্থিতি বাহাল ৰাখিবলৈও তেওঁলোকক অনুৰোধ জনোৱা হৈছে।
ধৰ্মঘটকাৰীসকলে বটলিং কাৰখানাৰ কাম-কাজত আৰু বিতৰণত ব্যাঘাত যাতে বেমেজালি ঘটাব নোৱাৰে, এই সন্দৰ্ভত, অসম আৰক্ষীৰ সঞ্চালক প্ৰধানলৈ প্ৰয়োজনীয় নিৰ্দেশনা জাৰি কৰিবলৈ গৃহ আৰু ৰাজনৈতিক বিভাগৰ অতিৰিক্ত মুখ্য সচিবৰ সৈতে আলোচনা কৰা হৈছে।
ইতিমধ্যে, ভাৰতীয় তেল নিগম কৰ্তৃপক্ষই জনাইছে যে ছেপ্টেম্বৰৰ ১০ আৰু ১১ তাৰিখে উত্তৰ-পূৰ্বীয় ৰন্ধনগেছ পৰিবহণ সংস্থাৰ সদস্য বিষয়া কৰ্মচাৰীৰ সৈতে আলোচনা কৰি বিষয়টো নিষ্পত্তি কৰা হৈছে।