“কেব”ৰ বিৰোধিতাত ABVP-ৰ পৰা পদত্যাগ অসমৰ ছাত্ৰ-ছাত্ৰীৰ

নাগৰিকত্ব সংশোধনী বিধেয়কৰ সমৰ্থনত এ বি ভি পিয়ে গুৱাহাটীৰ ৰাজপথত সমদল উলিওৱাৰ এদিন পিছতে বিধেয়কখনৰ বিৰোধিতা কৰি দিল্লীত গেৰুৱা ছাত্ৰ সংগঠনটো ত্যাগ কৰিছে অসমৰ ১২গৰাকী ছাত্ৰ-ছাত্ৰীয়ে।

আজি দিল্লীত তেওঁলোকে নিজৰ এই সিদ্ধান্তটো ৰাজহুৱা কৰাৰ লগতে হাতত প্লেকাৰ্ড লৈ কেবৰ বিৰোধিতাৰে থিয় হয়। এওঁলোক আটাইকেইজন এ বি ভি পিৰ উত্তৰ-পূব শাখাৰ দায়িত্বত আছিল।

গেৰুৱা বাহিনীৰ ছাত্ৰ সংগঠনটো ত্যাগ কৰা ছাত্ৰ-ছাত্ৰীসকল হ’ল ক্ৰমে- চেইখ ৰেইছা তব্বচুম ,সাধাৰণ সম্পাদক, লীজা গগৈ, যুটীয়া সম্পাদক, বিষ্ণুপৰ্ণ দত্ত, যুটীয়া সম্পাদক, নিয়ৰ শৰ্মা, সভাপতি ষ্টুডেণ্ট ৱেলফেয়াৰ, তন্ময় ডেকা, বিত্ত বিভাগৰ সভাপতি, তন্ময় মহন্ত, সাধাৰণ সম্পাদক, ষ্টুডেণ্ট ৱেলফেয়াৰ, সৃষ্টি দে’, সাংস্কৃতিক সভাপতি, ৰিয়ান দত্ত, সাংস্কৃতিক সম্পাদক, শ্ৰদ্ধা সুমন চহৰীয়া, সভাপতি, ষ্টুডেণ্ট ৱেলফেয়াৰ, সাহিল আহমেদ, লিটাৰেৰি সভাপতি, অদিতি, সমন্বয়ক, অনন্যা দত্ত, ছচিয়েল মিডিয়া হেড।

জানিব পৰামতে, নেতৃত্বই তেওঁলোকক ধৰি ৰখাৰ বহু চেষ্টা কৰিছিল যদিও কেবৰ বিৰোধিতাত অটল থাকে আৰু সংগঠনটো ত্যাগ কৰে।

“অসমত যেতিয়া ABVP-এ বিধেয়কখনৰ সমৰ্থনত সমদল বাহিৰ কৰে তেতিয়া আমি লজ্জিত হওঁ। ইয়াৰ পিছতে সংগঠনটোৰ নেতৃত্বৰ সৈতে যুক্তি-তৰ্ক কৰি কেবৰ বিৰোধিতাত পদত্যাগ কৰাৰ সিদ্ধান্ত লওঁ”, ইনছাইড এন ই নামৰ সংবাদ প্ৰতিষ্ঠানটোত সাধাৰণ সম্পাদক চেইখ ৰেইছাৰ উদ্ধৃতি।

জানিব পৰামতে, গৰিষ্ঠ সংখ্যক ওলাই অহাৰ পিছত এতিয়া সংগঠনটোৰ উত্তৰ-পূব কোষটোত মাত্ৰ ৫জনহে বাকী ৰৈছেগৈ। উত্তৰ-পূবৰ পৰা যোৱা ছাত্ৰ-ছাত্ৰীসকলৰ কল্যাণৰ বাবে প্ৰথমবাৰৰ বাবে এই কোষটো গঠন কৰা হৈছিল।

উল্লেখ কৰিব পাৰি যে বিধেয়কখনক সমৰ্থন জনাই ৭ ডিচেম্বৰত এ বি ভি পিৰ অসম শাখাই নিৰাপত্তা বেষ্টনীৰ মাজেৰে গুৱাহাটীত সমদল উলিয়াইছিল।

অসমত বিধেয়কখনৰ প্ৰতিবাদ তীব্ৰ গতিত চলি থকা সত্ত্বেও কাইলৈ ইয়াক লোকসভাত উত্থাপন কৰাৰ কথা।