ভীমা কোৰেগাঁও গোচৰৰ অভিযুক্ত ভাৰভাৰা ৰাওক জামিন উচ্চতম ন্যায়ালয়ৰ

চাৰিটাকৈ বছৰ কাৰাবন্দী হৈ থকাৰ পিছত অৱশেষত জামিন লাভ কৰিছে বিশিষ্ট মানৱ অধিকাৰ কৰ্মী তথা কবি ভাৰভাৰা ৰাৱে। ভীমা-কোৰেগাঁও গোচৰত অভিযুক্ত ৰাওক আজি উচ্চতম ন্যায়ালয়ে স্বাস্থ্যজনিত কাৰণত জামিন প্ৰদান কৰিছে।

অৱশ্যে উচ্চতম ন্যায়ালয়ৰ বিচাৰপীঠে ৰাওক জামিন প্ৰদান কৰিলেও ভীমা-কোৰেগাঁও গোচৰত তেওঁৰ বিৰুদ্ধে উত্থাপিত গোচৰসমূহ মোচন হোৱা নাই বুলি আদালতে স্পষ্ট কৰি দিছে।

ন্যায়াধীশ ইউইউ ললিত আৰু এছ ৰবীন্দ্ৰ ভাটেৰে গঠিত বিচাৰপীঠে লগতে ৰাওক গোচৰ সম্পূৰ্ণ নোহোৱালৈকে মুম্বাইৰ অধিকাৰ ক্ষেত্ৰ এৰি নাযাবলৈও নিৰ্দেশ দিয়ে।

ভাৰভাৰা ৰাৱে স্থায়ী জামিনৰ অনুৰোধ জনাই দাখিল কৰা আবেদনৰ শুনানি গ্ৰহণ কৰি আজি বিচাৰপীঠে ৰাওৰ স্বাস্থ্যৰ অসুস্থতাৰ প্ৰতি লক্ষ্য ৰাখি তেওঁ চিকিৎসাৰ ভিত্তিত জামিনৰ অধিকাৰী বুলি ৰায় দিয়ে।

জ্যেষ্ঠ অধিবক্তা আনন্দ গ্ৰোভাৰে ভাৰভাৰা ৰাওক প্ৰতিনিধিত্ব কৰি ন্যায়ালয়ত যুক্তি প্ৰদৰ্শন কৰি কয় যে ৰাওৰ বিৰুদ্ধে কোনো অভিযোগ আৰোপ কৰা নাই।

ৰাওৰ স্বাস্থ্যৰ অৱস্থাৰ দিশটোলৈ আঙুলিয়াই তেওঁ বিচাৰপীঠৰ আগত পাৰ্কিনছন ৰোগত আক্ৰান্ত ৰাওৰ উন্নত চিকিৎসা ব্যৱস্থাৰ ওপৰত বিচাৰপীঠক বিবেচনা কৰিবলৈ আহ্বান জনায়।

আনহাতে চৰকাৰী পক্ষৰ হৈ অতিৰিক্ত ছলিচিটৰ জেনেৰেল এছ.ভি. ৰাজুৱে ৰাওৰ জামিন নাকচ কৰিবলৈ আহ্বান জনাই ৰাৱে ডিচচাৰ্জ আবেদন দাখিল কৰি বিচাৰ প্ৰক্ৰিয়া বিলম্বিত কৰিবলৈ চেষ্টা কৰি আছে বুলি অভিযোগ কৰে।

কিন্তু শীৰ্ষ আদালতৰ বিচাৰপীঠে ৰাজুৰ এই অভিযোগক তীব্ৰ নিন্দা কৰে আৰু ৰাওৰ শাৰীৰিক অসুস্থতাৰ বিষয়ক লৈ বিবাদ নকৰিবলৈ সকীয়াই দিয়ে।

বিচাৰপীঠে কয়, “আপুনি তেখেতৰ স্বাস্থ্যৰ বিষয়ত বিবাদ নকৰিব। তেওঁৰ বয়সৰ ফালেও চকু দিয়ক। যদি অভিযুক্তই শাৰীৰিক কষ্ট পাই আছে, কাৰাগাৰত তেওঁৰ স্বাস্থ্যৰ অধিক অৱনতি হ’ব।”

কিন্তু চৰকাৰী অধিবক্তা গৰাকীয়ে পুনৰ দাবী কৰে যে ৰাও নিষিদ্ধ সংগঠন চিপিআই (মাও) গোটৰ এজন সদস্য আছিল আৰু তেওঁ জঘন্য কাৰ্যকলাপতো লিপ্ত হৈছিল।

ৰাওৰ কাৰ্যকলাপৰ প্ৰকৃতি দেশৰ বাবে বিপদজনক আৰু ক্ষতিকাৰক বুলি ৰাজুৱে আদালতৰ সন্মুখত মন্তব্য কৰে। কিন্তু আদালতৰ সন্মুখত এই সন্দৰ্ভত কোনো তথ্য দাখিল কৰিবলৈ অপাৰগ হয় চৰকাৰী অধিবক্তাগৰাকী।

উল্লেখ্য যে ২০১৭ চনৰ ৩১ ডিচেম্বৰত ভীমা কোৰেগাঁও যুদ্ধৰ দ্বিশতবৰ্ষৰ প্ৰাকমুহূৰ্তত পুনেৰ শনিবাৰৱাড়া দুৰ্গত আয়োজিত এক অনুষ্ঠানৰ পিছদিনা সংঘটিত হোৱা হিংসাত্মক ঘটনাত উচতনি দিয়াৰ অভিযোগত আৰু মাওবাদীৰ সৈতে সম্পৰ্ক থকাৰ অভিযোগত ভাৰভাৰা ৰাওসহ কেইবাগৰাকীও প্ৰখ্যাত ব্যক্তিক গ্ৰেপ্তাৰ কৰা হৈছিল।

ইতিমধ্যে কাৰাগাৰৰ ভিতৰতে মৃত্যুবৰণ কৰিছে মানৱ অধিকাৰ কৰ্মী ফাডাৰ ষ্টেন স্বামীয়ে। অৱশ্যে অধিবক্তা সুধা ভৰদ্বাজে যোৱা বৰ্ষৰ শেষৰ ফালে কাৰগাৰৰ পৰা মুক্তি লাভ কৰিছে। এতিয়াও কাৰাগাৰত আবদ্ধ হৈ আছে কেইবাগৰাকীও অভিযুক্ত ব্যক্তি।

তেওঁলোকৰ ওপৰত কাৰাগাৰত নিৰ্যাতন চলোৱা বুলি অভিযোগ উত্থাপন হোৱাৰ লগতে নূন্যতম স্বতন্ত্ৰতাতো বাধা দিয়া হৈছে বুলি অভিযোগ উঠিছে।