মেঘালয়ত অবৈধ খনন বন্ধ কৰিবলৈ সময় সীমা বান্ধি দিলে উচ্চতম ন্যায়ালয়ে! ৪ সপ্তাহৰ ভিতৰত শপতনামা দাখিলৰ নিৰ্দেশ

মঙলবাৰে উচ্চতম ন্যায়ালয়ে মেঘালয় চৰকাৰক খাচী পাহাৰত অবৈধ খনন ৰোধৰ বাবে গ্ৰহণ কৰা পদক্ষেপৰ বিশদ শপতনামা দাখিল কৰিবলৈ নিৰ্দেশ দিয়ে। মুখ্য ন্যায়াধীশ বি আৰ গাভাই, ন্যায়াধীশ কে বিনোদ চন্দ্ৰন আৰু ন্যায়াধীশ এন ভি অঞ্জৰিয়াৰ বিচাৰপীঠে ৰাজ্যখনক নথি দাখিল কৰিবলৈ অন্তিম চাৰি সপ্তাহৰ সময় দিছে আৰু সময়সীমাৰ কোনো ধৰণৰ বৃদ্ধিৰ অনুমতি দিয়া নহ’ব বুলি স্পষ্টভাবে উল্লেখ কৰিছে। আদালতে পৰিৱেশ সুৰক্ষাৰ প্ৰয়োজনীয়তাৰ ওপৰত গুৰুত্ব আৰোপ কৰি কয় যে এনে ধৰণৰ খনন কাৰ্য্যৰ ফলত চুবুৰীয়া ৰাজ্য অসমৰ বনাঞ্চল ধ্বংস হোৱাৰ লগতে বানপানীৰ সৃষ্টি হৈছে।

কেন্দ্ৰীয় ক্ষমতাশালী সমিতিৰ (চিইচি) ক্ষেত্ৰ ভ্ৰমণৰ ভিত্তিত এমিকাছ কিউৰিয়া হিচাপে কাম কৰা জ্যেষ্ঠ অধিবক্তা কে পৰমেশ্বৰে প্ৰাচীন বনাঞ্চলত অবাধ অবৈধ খননৰ বিষয়ে বিচাৰপীঠক অৱগত কৰে। অসমৰ অধিবক্তাই যুক্তি আগবঢ়ায় যে এই কাৰ্যকলাপৰ ফলত হোৱা ভয়াৱহ বানৰ বাবে বাসিন্দাসকলে কষ্টৰ সন্মুখীন হৈছে। মেঘালয়ৰ প্ৰতিনিধিগৰাকীয়ে দাবী কৰে যে অবৈধ খনন বন্ধ কৰা হৈছে আৰু কেৱল বৈধ কাৰ্য্যকলাপৰ অনুমতি প্ৰদান কৰা বুলি উল্লেখ কৰি ৰাষ্ট্ৰীয় সেউজ ন্যায়াধিকৰণৰ (এন জি টি) পূৰ্বৰ বিশদ আদেশৰ বিষয়ে উল্লেখ কৰে। কিন্তু ১৮ জুলাইৰ পৰিদৰ্শনৰ পিছত ৰাজ্যই দাখিল কৰা বুলি দাবী কৰিলেও চি ই চিৰ প্ৰশ্নাৱলীৰ সন্দৰ্ভত মেঘালয়ৰ উত্তৰ পোৱা নাই বুলি বিচাৰপীঠে প্ৰকাশ কৰে।

শপতনামা পুনৰীক্ষণ আৰু মানি চলাটো নিশ্চিত কৰাৰ বাবে আদালতে ছেপ্টেম্বৰ মাহত পৰৱৰ্তী শুনানিৰ দিন ধাৰ্য কৰিছে। অনিয়ন্ত্ৰিত খননৰ ফলত পৰিৱেশৰ ক্ষতি আৰু আন্তঃৰাজ্যিক প্ৰভাৱৰ ওপৰত চলি থকা উদ্বেগক মোকাবিলা কৰাৰ লক্ষ্যৰে এই নিৰ্দেশনা দিয়া হৈছে বুলি মত প্ৰকাশ কৰিছে।