দুৰ্নীতিৰ বিৰুদ্ধে কঠোৰ উচ্চতম ন্যায়ালয়: কেন্দ্ৰীয় কৰ্মচাৰীৰ বিৰুদ্ধে গোচৰ ৰুজু কৰিবলৈ নালাগে চিবিআইৰ সন্মতি   

উচ্চতম ন্যায়ালয়ে এক ঐতিহাসিক ৰায়দানত স্পষ্ট কৰি দিছে যে কেন্দ্ৰীয় চৰকাৰৰ কৰ্মচাৰীৰ বিৰুদ্ধে দুৰ্নীতি প্ৰতিৰোধ আইনৰ (PC Act) অধীনত উৎকোচ গ্ৰহণৰ গোচৰত ৰাজ্যিক আৰক্ষীয়েও তদন্ত কৰিব পাৰিব। ইয়াৰ বাবে কেন্দ্ৰীয় তদন্তকাৰী সংস্থা (CBI) ৰ কোনো অনুমোদন বা সন্মতিৰ প্ৰয়োজন নহ’ব।

উচ্চতম ন্যায়ালয়ে আঙুলিয়াই দিয়ে যে দুৰ্নীতি প্ৰতিৰোধ আইনৰ ১৭ নং ধাৰাই ৰাজ্যিক আৰক্ষী বা ৰাজ্যৰ কোনো বিশেষ সংস্থাক কেন্দ্ৰীয় চৰকাৰৰ কৰ্মচাৰীৰ বিৰুদ্ধে উৎকোচ, দুৰ্নীতি আৰু দুৰাচাৰৰ গোচৰ পঞ্জীয়ন বা তদন্ত কৰাত বাধা নিদিয়ে।

ন্যায়াধীশ জে. বি. পাৰ্দিৱালা আৰু ন্যায়াধীশ সতীশ চন্দ্ৰ শৰ্মাৰ দ্বাৰা গঠিত এখন বিচাৰপীঠে স্পষ্ট কৰি দিয়ে যে ৰাজ্যিক আৰক্ষীয়ে কেন্দ্ৰীয় চৰকাৰৰ কৰ্মচাৰীৰ বিৰুদ্ধে গোচৰ ৰুজু কৰাৰ আগতে চিবিআইৰ (CBI) পৰা কোনো ধৰণৰ আগতীয়া অনুমতি লোৱাটো বাধ্যতামূলক নহয়।

উল্লেখ্য যে, শেহতীয়াকৈ নৱল কিশোৰ মীনা নামৰ এজন ব্যক্তিৰ আবেদন খাৰিজ কৰি উচ্চতম ন্যায়ালয়ে ২০২৫ চনৰ ৩ অক্টোবৰত ৰাজস্থান উচ্চ ন্যায়ালয়ে প্ৰদান কৰা ৰায়ক বাহাল ৰাখে।