অভূতপূৰ্ব! হাইকোৰ্টৰ দুই ন্যায়াধীশৰ সংঘাতত হস্তক্ষেপ ছুপ্ৰিম কোৰ্টৰ; গঠন সাংবিধানিক বিচাৰপীঠ

কলকাতা উচ্চ ন্যায়ালয়ৰ ন্যায়াধীশসকলৰ মাজত সংঘটিত অভূতপূৰ্ব সংঘাতত হস্তক্ষেপ কৰিলে উচ্চতম ন্যায়ালয়ে। বৃহস্পতিবাৰে ন্যায়াধীশ অভিজিৎ গংগোপাধ্যায় আৰু ন্যায়াধীশ সৌমেন সেনৰ মাজত সংঘটিত হোৱা অভূতপূৰ্ব সংঘাতৰ ঘটনাত স্বতঃস্ফূৰ্ত ব্যৱস্থা গ্ৰহণ কৰিছে উচ্চতম ন্যায়ালয়ে।

উচ্চতম ন্যায়ালয়ৰ মুখ্য ন্যায়াধীশ ডি ৱাই চন্দ্ৰচুড়ৰ নেতৃত্বত পাঁচজনীয়া বিশেষ বিচাৰপীঠ গঠন কৰা হৈছে। কাইলৈ ​​শনিবাৰে পুৱা ১০:৩০ বজাত উচ্চতম ন্যায়ালয়ৰ মুখ্য ন্যায়াধীশৰ নেতৃত্বত পাঁচজনীয়া সাংবিধানিক বিচাৰপীঠে বিষয়টো শুনানি গ্ৰহণ কৰাৰ সম্ভাৱনা আছে।

একাংশ জ্যেষ্ঠ অধিবক্তাৰ মতে শেহতীয়াকৈ উচ্চ ন্যায়ালয়ৰ ন্যায়াধীশৰ কামকাজত উচ্চতম ন্যায়ালয়ৰ স্বপ্ৰণোদিত পদক্ষেপ আৰু পাঁচজনীয়া সাংবিধানিক বিচাৰপীঠ গঠন স্বাভাৱিকতে এক অভূতপূৰ্ব ঘটনা।

পাঁচজনীয়া সাংবিধানিক বিচাৰপীঠ কোন কোন আছে? মুখ্য ন্যায়াধীশ ডি ৱাই চন্দ্ৰচুড়, ন্যায়াধীশ সঞ্জীৱ খান্না, ন্যায়াধীশ বি আৰ গাভী, ন্যায়াধীশ সূৰ্য্য কান্ত আৰু ন্যায়াধীশ অনিৰুদ্ধ বসু।

শনিবাৰে ​​পাঁচজনীয়া সংবিধানিক বিচাৰপীঠে এই বিষয়ত শুনানি গ্ৰহণ কৰাৰ সম্ভাৱনা আছে। উচ্চতম ন্যায়ালয়ত এই বিষয়টো কোন দিশত আগবাঢ়িব সেয়া অৱশ্যে ​​লক্ষণীয় হ’ব।

উল্লেখ্য যে  কলকাতা উচ্চ ন্যায়ালয়ত মেডিকেলত নামভৰ্তি সম্পৰ্কীয় এটা গোচৰৰ শুনানিক কেন্দ্ৰ কৰি এই সংঘাত আৰম্ভ হৈছিল। এই গোচৰটো কলকাতা উচ্চ ন্যায়ালয়ৰ ন্যায়াধীশ অভিজিৎ গংগোপাধ্যায়ৰ একক বিচাৰপীঠত উঠিছিল। তাত ন্যায়াধীশ গংগোপাধ্যায়ে অনুভৱ কৰিছিল যে বিষয়টো চিবিআইৰ তদন্তৰ প্ৰয়োজন আৰু সেয়েহে তেওঁ তাৰ নিৰ্দেশ দিছিল।

কিন্তু ইতিমধ্যে ৰাজ্য চৰকাৰৰ হৈ ন্যায়াধীশ সৌমেন সেনৰ খণ্ড বিচাৰপীঠলৈ যায় ৰাজ্য। তাৰ পৰাই ৰাজ্যই প্ৰথমে অন্তৱৰ্তীকালীন স্থগিতাদেশ পায় আৰু পিছলৈ একক বিচাৰপীঠৰ আদেশ খণ্ড বিচাৰপীঠত খাৰিজ হৈ পৰে। তাৰ পিছতেই ন্যায়াধীশ সৌমেন সেনৰ বিৰুদ্ধে ক্ষোভ উজাৰি দিয়ে ন্যায়াধীশ অভিজিৎ গংগোপাধ্যায়ে।