আঘাতঃ আফগানিস্তানৰ বিৰুদ্ধে শৃংখলাৰ পৰা বাহিৰ সূৰ্যকুমাৰ যাদৱ, অনিশ্চিত পাণ্ডিয়া

সম্প্ৰতি দক্ষিণ আফ্ৰিকা ভ্ৰমণৰত ভাৰতীয় দলে আগন্তুত টেষ্ট শৃংখলাৰ পিছতে আফগানিস্তানৰ বিৰুদ্ধে এক টি-২০ শৃংখলাত অংশ ল’ব। তিনিখন মেচৰ এই টি-২০ শৃংখলাটো অহা ১১ জানুৱাৰীৰ পৰাআৰম্ভ হ’ব।

পিছে এই শৃংখলাৰ পূৰ্বে সমস্যাত পৰিছে ভাৰতীয় দল। দেশৰ তাৰকা বেটাৰ সূৰ্যকুমাৰ যাদৱ নাথাকিব এই শৃংখলাত। ভৰিৰ আঘাতৰ বাবে এই শৃংখলাত অংশগ্ৰহণ কৰিব নোৱাৰিব তাৰকাগৰাকীয়ে।

জোহান্সবাৰ্গত দক্ষিণ আফ্ৰিকাৰ বিৰুদ্ধে অন্তিম টি-২০ত ফিল্ডিং কৰি থকাৰ সময়ত যাদৱে গোৰোহাত আঘাত পাইছিল আৰু এই আঘাতৰ বাবে যাদৱ প্ৰায় ছয় সপ্তাহ ধৰি ক্ৰিকেটৰ পৰা আঁতৰি থাকিব লগা হ’ব পাৰে বুলি জানিব পৰা গৈছে।

বিচিচিআইৰ এক সূত্ৰ অনুসৰি, যাদৱে এই সন্দৰ্ভত ইতিমধ্যে ৰাষ্ট্ৰীয় ক্ৰিকেট একাডেমিত অৱগত কৰিছে আৰু চিকিৎসকৰ দলে তেওঁ আঘাতপ্ৰাপ্ত বুলি নিশ্চিত কৰিছে। সেয়ে তেওঁতিনি সপ্তাহৰ পিছত আৰম্ভ হ’বলগীয়া আফগানিস্তানৰ বিৰুদ্ধে শৃংখলাত খেলিব নোৱাৰিব।

আনহাতে যাদৱে আই পি এলত খেলাৰ পূৰ্বে নিজৰ ফিটনেছ পৰীক্ষা কৰিবলৈ ফেব্ৰুৱাৰী মাহত ৰঞ্জি ট্ৰফীত মুম্বাইৰ হৈ খেলিব পাৰে বুলি সম্ভাৱনা প্ৰকাশ কৰে বিচিচিআইৰ সূত্ৰই।

ইফালে দলৰ তাৰকা অলৰাউণ্ডাৰ তথা ৰোহিত শৰ্মাৰ অনুপস্থিতিত ভাৰতীয় দলক বহুকেইটা শৃংখলাত নেতৃত্ব দিয়া হাৰ্দিক পাণ্ডিয়াও গোৰোহাৰ আঘাতৰ পৰা সুস্থ হোৱাৰ সম্ভাৱনা এই মুহূৰ্তত কম বুলি জানিব পৰা গৈছে।

বিচিচিআইৰ সূত্ৰটোৱে লগতে কয় যে বৰ্তমানলৈকে হাৰ্দিকৰ ফিটনেছ সন্দৰ্ভত কোনো তথ্য নাই। এনে অৱস্থাত সূৰ্যকুমাৰ যাদৱ বা হাৰ্দিক পাণ্ডিয়া উপলব্ধ নহ’লে হয়তো ৰোহিত শৰ্মাই দলৰ নেতৃত্ব ল’ব লাগিব বুলি চৰ্চিত হৈছে।

সমান্তৰালকৈ ব্যক্তিগত কাৰণত দক্ষিণ আফ্ৰিকাৰ বিৰুদ্ধ টেষ্ট শৃংখলাৰ পৰা অব্যাহতি লোৱা ঈশান কিষাণো আফগানিস্তানৰ বিপক্ষে শৃংখলাত উপলব্ধ নহ’ব পাৰে আৰু তেওঁৰ অনুপস্থিতিত জিতেশ শৰ্মাই উইকেটৰক্ষকৰ ভূমিকা ল’ব পাৰে বুলি আলোচনা চলিছে।