ডিব্ৰু নৈত সন্দেহযুক্ত আলফা স্বাধীন কেডাৰৰ মৃতদেহ উদ্ধাৰ; পেঙেৰীত চাঞ্চল্য

আজি পুৱা তিনিচুকীয়া জিলাৰ পেঙেৰীত ডিব্ৰু নৈত উটি অহা এজন সন্দেহযুক্ত আলফা স্বাধীনৰ কেডাৰৰ মৃতদেহ উদ্ধাৰ হোৱাক কেন্দ্ৰ কৰি অঞ্চলটোত স্বাঞ্চল্যই বিৰাজ কৰিছে।

নিহত কেডাৰজনক এতিয়ালৈকে চিনাক্ত কৰিব পৰা হোৱা নাই। সামৰিক সাজপাৰ পৰিহিত নিহত আলফা কেডাৰজনৰ মৃতদেহত গ্ৰেনেড আৰু মেগজিন বন্ধা থকাকলৈ চায় তেওঁৰ ২৪ ছেপ্টেম্বৰৰ নিশা আলফা স্বাধীন আৰু সেনাৰ মাজত সংঘটিত গুলীয়াগুলীত নিহত হোৱা বুলি সন্দেহ কৰা হৈছে।

উল্লেখযোগ্য যে, উক্ত গুলীয়াগুলীত দুগৰাকীকৈ আলফা (স্বা)ৰ কেডাৰ আঘাটপ্ৰাপ্ত হোৱা বুলি সেনাই দাবী কৰিছিল।

প্ৰাপ্ত তথ্য মতে, আজি পুৱা মাছমৰীয়াই টেকেৰী ঘাটত মৃতদেহটো প্ৰত্যক্ষ কৰি পেঙেৰী আৰক্ষী থানাত খবৰ দিয়ে। ইয়াৰ পিছতে পেঙেৰী আৰক্ষী ঘটনাস্থলীত উপস্থিত হৈ মৃতদেহটোক উদ্ধাৰ কৰি ঘটনা সম্পৰ্কত অনুসন্ধান আৰম্ভ কৰে।