সৰ্বানন্দ সোণোৱাললৈ ডঃ শ্যামা প্ৰসাদ মুখাৰ্জী সন্মান

অসমৰ মুখ্য মন্ত্ৰী সৰ্বানন্দ সোণোৱালে শুকুৰবাৰে ডঃ শ্যামাপ্ৰসাদ মুখাৰ্জী বঁটা গ্ৰহণ কৰিছে।

ৰাজনীতিৰ ক্ষেত্ৰত আগবঢ়োৱা বৰঙনিৰ বাবে সোণোৱালক স্বৰাজ্য সন্মান ২০২০-ৰ অন্তৰ্গত এই বঁটা প্ৰদান কৰা হৈছে।

ভাৰতৰ বিদেশ মন্ত্ৰী এছ জয়শংকৰ আৰু পীপলছ মজলিছ অৱ মালদিভছৰ অধ্যক্ষ মহম্মদ নাছিদে সোণোৱালক এই সন্মান প্ৰদান কৰে।

স্বৰাজ্য এৱৰ্ডছৰ তৰফৰ পৰা সোণোৱালক একে সময়তে জনপ্ৰিয় ৰাজনীতিক আৰু সক্ষম প্ৰশাসক বুলি অভিহিত কৰা হৈছে।

বঁটা গ্ৰহণ কৰি সোণোৱালে কয়, “এই বঁটা প্ৰাপ্তিয়ে দেশৰ অখণ্ডতাৰ দিশত অধিক দায়বদ্ধতাৰে সেৱা আগবঢ়োৱাৰ বাবে উদ্বুদ্ধ কৰিছে।”

গুজৰাটৰ টেণ্ট চিটিত ইণ্ডিয়া ফাউণ্ডেচন আৰু ইণ্ডিক একাডেমিৰ সহযোগত এই বঁটা আগবঢ়োৱা হৈছিল।

সোণোৱালৰ উপৰি সংস্কৃতিৰ ক্ষেত্ৰত ভাৰতবালাক উস্তাদ বিছমিল্লা খান বঁটা, সমাজসেৱাৰ ক্ষেত্ৰত কে পৰচৰনক শ্ৰী নাৰায়ন গুৰু বঁটা আৰু অৰ্থনীতিৰ ক্ষেত্ৰত এন কে সিঙক ডঃ বি আৰ চেনয় বঁটা আগবঢ়োৱা হৈছে।