দেশবাসীৰ ৰোষত পৰাৰ ভয়ত আতংকিত নেকি বাবৰ আজম! পাকিস্তানলৈ অহাৰ পৰিৱৰ্তে ছুটী উপভোগৰ বাবে ইংলেণ্ডমুখী পাক তাৰকাজন
টি-২০ বিশ্বকাপৰ অন্তিমখন খেলত আয়াৰলেণ্ডক পৰাস্ত কৰাৰ পাছতো পাকিস্তানে প্ৰতিযোগিতাখনৰ পৰা আঁতৰি আহিবলগীয়া হৈছিল। এই মেচত সোমোৱাৰ পূৰ্বেই পাকিস্তান প্ৰতিযোগিতাখনৰপৰা বাহিৰ হৈছিল। বিশ্বকাপৰ পাছতে পাকিস্তানৰ ক্ৰিকেটাৰসকল ছুটীত গৈছে। বাবৰ আজমকে ধৰি ছয়গৰাকী ক্ৰিকেটাৰে ছুটীৰ বাবে লণ্ডনলৈ গৈছে বুলি শেহতীয়াকৈ প্ৰকাশ পাইছে।
পাকিস্তানৰ সংবাদ মাধ্যমৰ বাতৰি অনুসৰি বাবৰৰ বাহিৰেও মহম্মদ আমিৰ, ইমাদ ৱাছিম, হেৰিছ ৰাউফ, ছাদাব খান আৰু আজম খান লণ্ডনলৈ গৈছে।তেওঁলোক পাকিস্তানলৈ ঘূৰি অহা নাই। লণ্ডনত পৰিয়াল আৰু বন্ধু-বান্ধৱীৰ সৈতে সময় কটাব বিচাৰে। জানিব পৰা মতে একাংশ ক্ৰিকেটাৰে স্থানীয় লীগতো খেলাৰ ইচ্ছা প্ৰকাশ কৰিছে।
ঘৰলৈ উভতি আহিব সহকাৰী প্ৰশিক্ষক আজহাৰ মাহমুদ আৰু প্ৰশিক্ষক গেৰী কাৰ্ষ্টেন। বাকী ক্ৰিকেটাৰসকলো দেশলৈ উভতি যোৱাৰ কথা। ইয়াৰ উপৰিও কোচিং ষ্টাফত থকা বিদেশী নাগৰিকসকল ঘৰলৈ উভতি যাব।
বিশ্বকাপৰ প্ৰথমখন খেলত আমেৰিকা আৰু দ্বিতীয়খন খেলত ভাৰতৰ হাতত পৰাস্ত হয় পাকিস্তান। কানাডা আৰু আয়াৰলেণ্ডক পৰাস্ত কৰিছিল যদিও পাকিস্তানৰ কোনো সহায় নহ’ল।
উল্লেখ্য যে, আগষ্ট মাহত পাকিস্তানত দুখন মেচৰ টেষ্ট শৃংখলা খেলিব বাংলাদেশে। ইংলেণ্ডে অক্টোবৰ মাহত পাকিস্তান ভ্ৰমণৰ চৰ্চা চলিছে।