ধোনীৰ কন্যা জিভাক ভাবুকি; আৰক্ষীয়ে গ্ৰেপ্তাৰ কৰিলে এজন কিশোৰক
টীম ইণ্ডিয়াৰ প্ৰাক্তন অধিনায়ক মহেন্দ্ৰ সিং ধোনীৰ কন্যা জিভাক ভাবুকি দিয়াৰ অভিযোগত গুজৰাটৰ পৰা এজন ১৬বছৰীয়া কিশোৰক আৰক্ষীয়ে গ্ৰেপ্তাৰ কৰিছে।
গুজৰাটৰ মুন্দ্ৰা অঞ্চলৰ পৰা দেওবাৰে আৰক্ষীয়ে কিশোৰজনক গ্ৰেপ্তাৰ কৰে।
আৰক্ষীয়ে জানিবলৈ দিয়ে যে ধোনীৰ পত্নী সাক্ষী ধোনীৰ ইনষ্টাগ্ৰাম একাউন্টত প’ষ্ট কৰা এক জঘন্য ভাবুকিপূৰ্ণ বাৰ্তা সন্দৰ্ভত জেৰাৰ বাবে দ্বাদশ শ্ৰেণীৰ ছাত্ৰজনক গ্ৰেপ্তাৰ কৰা হৈছে।
আৰক্ষীয়ে দাবী কৰো মতে কলকাতা নাইট ৰাইডাৰ্ছ আৰু চেন্নাই ছুপাৰ কিংছৰ মাজৰ খেলৰ পাছতে ইনষ্টাগ্ৰামত সেই বাৰ্তা প’ষ্ট কৰা বুলি কিশোৰজনে স্বীকাৰ কৰিছে।
ৰাঁচীৰ আৰক্ষীয়ে প্ৰথমতে কচ্ছ (পশ্চিম) অঞ্চলৰ আৰক্ষীক গোটেই ঘটনা অৱগত কৰে আৰু সেই কিশোৰজনে ভাবুকি দিছিল নে নাই সেয়া নিশ্চিত হ’বলৈ আহ্বান জনায়।
ইয়াৰ পাছতে কচ্ছ আৰক্ষীয়ে জেৰাৰ বাবে অভিযুক্ত কিশোৰজনক আটক কৰে।
এই কিশোৰজনে ভাবুকি দিছিল বুলি আৰক্ষী নিশ্চিত হৈছে। এজাহাৰ দাখিল কৰা সূত্ৰে কিশোৰজনক ৰাঁচীলৈ প্ৰেৰণ কৰা হ’ব।