বৰপেটাত ঈশান উদয় বৃত্তি কেলেংকাৰী; আৰক্ষীৰ জালত কেলেংকাৰীৰ সৈতে জড়িত ১০ অভিযুক্ত

ভাৰত চৰকাৰৰ মানৱ সম্পদ উন্নয়ন মন্ত্ৰ্যালয়ে বিশ্ববিদ্যালয় অনুদান আয়োগৰ জৰিয়তে মেধাৰ ভিত্তিত স্নাতক পাঠ্যক্ৰম অধ্যয়ন কৰি থকা দুখীয়া ছাত্ৰ-ছাত্ৰী সকলক প্ৰদান কৰা ঈশান উদয় বৃত্তি কেলেংকাৰীয়ে লৈছে নতুন মোৰ৷

ঈশান উদয় বৃত্তি কেলেংকাৰীৰ সৈতে জড়িত থকাৰ অভিযোগত বৰপেটাৰ এম চি কলেজৰ কৰ্মচাৰী ৰতন হাজৰিকাক গ্ৰেপ্তাৰৰ পিচতে পুনৰ উদ্ধাৰ হৈছে ন- ন তথ্য প্ৰমাণ ৷

ৰতন হাজৰিকাৰ স্বীকাৰোক্তিৰ ভিত্তিত বৰপেটা আৰক্ষীয়ে পুনৰ আটক কৰিছে ১০জন অভিযুক্তক৷

আৰক্ষীয়ে আটক কৰা অভিযুক্ত কেইজন হ’ল ৰূপচান্দ আলী, ছাহনুৰ, ছহিদুল মিয়া ওৰফে টিপু, আচুৰ উদ্দিন, তাৰু আলি, চাদ্দাম শিকদাৰ, দানিছ খান, চম্পিয়াৰা খাতুন, হালিদা বেগম আৰু মহিৰুদ্দিন  ৷

আৰক্ষীয়ে ১০ অভিযুক্তক সোধ পোচৰ পিছত ৰূপচান্দ আলী, ছাহনুৰ আৰু ছহিদুল মীৰ ওৰফে টিপুক গ্ৰেপ্তাৰ কৰে ৷

আনহাতে, সোধপোচৰ পিছতে ৭ অভিযুক্তক মুকলি কৰি দিয়ে আৰক্ষীয়ে ৷

অভিযুক্ত সকলৰ পৰা ১২ টা মোবাইল ফোন, দুটা কম্পিউটাৰৰ প্ৰিন্টাৰ, এটা লেপটপ, ২৫ খন এটিএম কাৰ্ড, ১৭ খন ডেবিট কাৰ্ড, ৫ টা বেংকৰ পাছবুক, চেকবুক, আৰু আধাৰ কাৰ্ডৰ লগতে বহুসংখ্যক ভোটাৰ কাৰ্ড, আধাৰ কাৰ্ড আৰু  চাৰ্টিফিকেটৰ ক’পি আৰু এটা স্বোৱাইপ মেচিন জব্দ কৰে আৰক্ষীয়ে ৷

ইপিনে, হাজাৰ হাজাৰ ভুৱা ছাত্ৰ ছাত্ৰীৰ নামত কোটি কোটি টকা উলিয়াই নিয়া কেলেংকাৰী চক্ৰটোৰ মুল নায়ক বৰপেটা দামালঝাৰ গাৱৰ মিনহাজুল হক আৰু শিলা গাঁৱৰ ৰকিবুল খান পলাতক হৈ থকা বুলি আৰক্ষীয়ে জানিবলৈ দিয়ে ৷