চত্তীশগড়ত ভয়ানক দুৰ্ঘটনা! পাহাৰত খুন্দিয়াই চূৰমাৰ হ’ল চাৰ্টাড বিমান
চত্তীশগড়ৰ যশপুৰ জিলাত সোমবাৰে এক ভয়ংকৰ বিমান দুৰ্ঘটনা সংঘটিত হয়। এখন চাৰ্টাৰ্ড বিমানে পাহাৰৰ ঢালত খুন্দা মৰাৰ ফলত এই শোকাৱহ ঘটনাটো ঘটে।
প্ৰাথমিক খবৰ অনুসৰি, বিমানখনে আৰা পাহাৰত খুন্দা মাৰিছিল আৰু এই দুৰ্ঘটনাত বিমানখনৰ পাইলট তথা সহ-পাইলট—দুয়োৰে মৃত্যু হৈছে। সেই সময়ত বিমানখনত আন কোনো যাত্ৰী আছিল নে নাই, সেই কথা এতিয়ালৈকে স্পষ্ট হোৱা নাই আৰু প্ৰশাসনে সমগ্ৰ বিষয়টো পৰীক্ষা কৰি আছে।
ঘটনাৰ খবৰ পোৱাৰ লগে লগে জিলাখনৰ শীৰ্ষ আৰক্ষী বিষয়া লাল উম্মেদ সিঙৰ নেতৃত্বত এটা দল ঘটনাস্থলীত উপস্থিত হৈ উদ্ধাৰ অভিযান আৰম্ভ কৰে।
ইফালে, ছচিয়েল মিডিয়াত ভাইৰেল হোৱা একাংশ দৃশ্যত দেখা গৈছে যে পাহাৰৰ ঢালত পৰি থকা বিমানখনৰ ভগ্নাংশৰ পৰা ক’লা ধোঁৱা আৰু জুইৰ শিখা ওলাইছে, যাৰ ফলত সমগ্ৰ অঞ্চলটোত আতংকৰ সৃষ্টি হৈছে।
প্ৰশাসনৰ সূত্ৰই জনোৱা মতে, যশপুৰ জিলাৰ নাৰায়ণপুৰ থানাৰ অন্তৰ্গত খুৰাসাগৰহা গাঁৱৰ সমীপৰ ৰতনপাহলী অৰণ্যত এই দুৰ্ঘটনাটো সংঘটিত হৈছে। ধাৰণা কৰা হৈছে যে বিমানখন মাটিৰ পৰা মাত্ৰ ৩০ ফুট উচ্চতাৰে উৰি আছিল আৰু গছত খুন্দা খাই নিয়ন্ত্ৰণ হেৰুৱাই পাহাৰত আছাড় খাই পৰে।
ঘটনাস্থলীৰ পৰা প্ৰাপ্ত এটা ভিডিঅ’ত দেখা গৈছে যে সৰু বিমানখন গছৰ একেবাৰে ওপৰেৰে উৰি গৈছিল আৰু তাৰ কিছু সময়ৰ পিছতেই এই দুৰ্ঘটনাটো ঘটে।
উদ্ধাৰকাৰী দলে বৰ্তমান পৰিস্থিতি পৰ্যবেক্ষণ কৰি আছে যদিও প্ৰশাসনৰ তৰফৰ পৰা এতিয়ালৈকে কোনো আনুষ্ঠানিক ঘোষণা কৰা হোৱা নাই।