কাশ্মীৰী পণ্ডিতক হত্যা কৰা সন্ত্ৰাসবাদীক এনকাউণ্টাৰত গুলীয়াই হত্যা

জম্মু আৰু কাশ্মীৰ আৰক্ষীয়ে মঙলবাৰে পুলৱামা জিলাৰ আৱন্তিপোৰাৰ পদগামপোৰা গাঁৱত এজন ‘সন্ত্রাসবাদী’ক গুলীয়াই হত্যা কৰে৷ আৰক্ষীয়ে মৃত সন্ত্ৰাসবাদীজন আকিব মুস্তাক ভাট বুলি চিনাক্ত কৰিছে।

আৰক্ষীয়ে প্ৰকাশ কৰা মতে আকিব মুস্তাক ভাটে প্ৰথমে হিজবুল মুজাহিদীনেৰে জড়িত আছিল যদিও পিছত দ্য ৰেজিষ্টেন্স ফ্ৰণ্টত যোগ দিছিল।

টুইটাৰত এক বিবৃতিত জে এণ্ড কেৰ অতিৰিক্ত আৰক্ষী সঞ্চালক প্ৰধানে কয়, “পুলৱামাত নিহত সন্ত্ৰাসবাদীজন আকিব মুস্তাক ভাট (এ কেটেগৰী) বুলি চিনাক্ত কৰা হৈছে। প্ৰথমতে তেওঁ এইচ এম টেৰ’ৰ আউটফিটত কাম কৰিছিল, বৰ্তমান তেওঁ টি আৰ এফৰ সৈতে কাম কৰি আহিছিল। এই ভাটে সঞ্জয় শৰ্মাক হত্যা কৰিছিল।”

সংবাদ সংস্থাৰ পিটিআইৰ মতে পাডগামপোৰা অঞ্চলত ঘেৰাও আৰু তালাচী অভিযানৰ সময়তে আৰক্ষী আৰু সন্ত্ৰাসাবাদীৰ মাজত গুলীবৰ্ষণ আৰম্ভ হয়। এই সংঘৰ্ষত সন্ত্ৰাসাবাদী আকিব মুস্তাক ভাট নিহত যোৱাৰ লগতে নিৰাপত্তা বাহিনীৰ দুজন জোৱানো আহত হয়।

উল্লেখ্য যে দুদিন পূৰ্বে পুলৱামাৰ আচান অঞ্চলত বেংক গাৰ্ড হিচাপে কৰ্মৰত সঞ্জয় শৰ্মাক পত্নীৰ বাবে স্থানীয় বজাৰৰ পৰা ঔষধ ক্ৰয় কৰিবলৈ যাওঁতে ঘৰৰ পৰা মাত্ৰ এশ মিটাৰ ভিতৰতে গুলীয়াই হত্যা কৰা হৈছিল। উক্ত আক্ৰমণত শৰ্মাৰ পত্নীয়ে কোনো আঘাত নোপোৱাকৈ পলায়ন কৰিবলৈ সক্ষম হয় যদিও শৰ্মা আক্ৰমণত গুৰুতৰভাৱে আহত হয় আৰু ততাতৈয়াকৈ চিকিৎসালয়লৈ নিয়াৰ সময়তে তেওঁৰ মৃত্যু হয়।

জানিব পৰা মতে শৰ্মাহঁতেই বৰ্তমান গাঁওখনৰ অকলশৰীয়া কাশ্মীৰী পণ্ডিত পৰিয়াল। এই শৰ্মাই হৈছে ২০২১ চনৰ অক্টোবৰ মাহত সন্ত্ৰাসবাদীয়ে সম্প্ৰদায়টোক পুনৰায় আক্ৰমণৰ কৰাৰ পিছত উপত্যকাত নিহত হোৱা পঞ্চমজন কাশ্মীৰী পণ্ডিত।

শৰ্মাই পত্নী সুনীতা আৰু তেওঁলোকৰ তিনিটা সন্তান — দুগৰাকী কন্যা আৰু এটি পুত্ৰক এৰি থৈ গৈছে।