সত্তৰ বছৰীয়া মানৱ অধিকাৰ কৰ্মী তথা সাংবাদিক গৌতম নৱলাখাক জামিন মঞ্জুৰ কৰিলে বম্বে উচ্চ ন্যায়ালয়ে
বাৰ এণ্ড বেঞ্চৰ প্ৰতিবেদন অনুসৰি ন্যায়াধীশ এ এছ গাডকাৰী আৰু এছ জি ডি জিৰ সংমণ্ডল বিচাৰপীঠে সত্তৰ বছৰীয়া মানৱ অধিকাৰ কৰ্মী গৌতম নৱলাখাক জামিন মঞ্জুৰ কৰে। কিন্তু উচ্চ ন্যায়ালয়ৰ এই নিৰ্দেশক প্ৰত্যাহ্বান জনাই উচ্চতম ন্যায়ালয়ৰ কাষ চাপিব পাৰে এন আই এয়ে। ইয়াৰ বাবে উচ্চ ন্যায়ালয়েও NIAক প্ৰদান কৰিছে তিনি সপ্তাহৰ সময় ।
২০১৮ চনৰ আগষ্ট মাহত গৌতম নৱলাখাক ইউএপিএ আইনৰ অধীনত ৰাষ্ট্ৰীয় অনুসন্ধান সংস্থাই গ্ৰেপ্তাৰ কৰিছিল। ২০১৭ চনৰ ৩১ ডিচেম্বৰত মহাৰাষ্ট্ৰৰ পুনেত অনুষ্ঠিত হোৱা এলগাৰ পৰিষদৰ কনক্লেভত উচতনিমূলক ভাষণ দিয়াৰ লগতে অনুষ্ঠানটোৰক আৰ্থিকভাবে সহায় কৰাৰ অভিযোগ উত্থাপন হৈছিল সাংবাদিকগৰাকীৰ বিৰুদ্ধে।
আৰক্ষীয়ে দাবী কৰিছিল যে এই সন্মিলন মাওবাদীৰ সমৰ্থনকাৰী। অভিযোগ অনুসৰি এই উচতনিমূলক ভাষণৰ ফলত ভীমা কোৰেগাঁও যুদ্ধৰ ২০০ বছৰীয়া জয়ন্তীত হিংসাত্মক পৰিস্থিতিৰ সৃষ্টি হয়।
এই ঘটনাত মুঠ ১৬ জন বিশিষ্ট মানৱ অধিকাৰ কৰ্মী, সাহিত্যিক আৰু অধ্যাপকক গ্ৰেপ্তাৰ কৰা হৈছিল। গৌতম নৱলাখাকে ধৰি ৭ জন লোকে ইতিমধ্যে জামিন লাভ কৰিছে।
এই গোচৰৰ আন এজন অভিযুক্ত খিলঞ্জীয়া অধিকাৰ কৰ্মী ফাদাৰ ষ্টেন স্বামী আৰক্ষীৰ জিম্মাত থকা অৱস্থাত মৃত্যু হয়।