১২ বছৰীয়া কিশোৰীক ধৰ্ষণ কৰা আৰক্ষী কনিষ্টবল আব্দুলক গ্ৰেপ্তাৰ

১২ বছৰীয়া এগৰাকী কিশোৰীক ধৰ্ষণ কৰা আৰক্ষী কনিষ্টবল এজনক বুধবাৰে বঙাইগাঁও আৰক্ষীৰ এটা দলে গ্ৰেপ্তাৰ কৰিবলৈ সক্ষম হয়। কনিষ্টবলজন আব্দুল ৰেজ্জাক বুলি জানিব পৰা গৈছে।

২৭ জুলাই অৰ্থাৎ শনিবাৰৰ পৰা পলাতক অৱস্থাত থকা ৰেজ্জাকক কালি আৰক্ষীৰ দলটোৱে ফকিৰাগ্ৰামৰ পৰা গ্ৰেপ্তাৰ কৰে।

জানিব পৰা মতে যোৱা শনিবাৰে লম্পট স্বভাৱৰ এই আৰক্ষী কনিষ্টবল জনে কিশোৰী গৰাকীক ধৰ্ষণ কৰি পলায় যায়।

পৰিয়ালৰ লোকে পিছত এই সকলো কথা জানিব পাৰি আৰক্ষীক অৱগত কৰোৱাত আৰক্ষীয়ে পক্সো (POCSO) আইনৰ অধীনত কনিষ্টবলজনৰ বিৰুদ্ধে এটা গোচৰ ৰুজু কৰি অনুসন্ধান আৰম্ভ কৰে।

বঙাইগাঁও আৰক্ষীয়ে যোৱা কেইবাদিন ধৰি তদন্ত চলাই আছিল যদিও লম্পট কনিষ্টবলজনক কৰায়ত্ত কৰিবলৈ সক্ষম হোৱা নাছিল। অৱশেষত এক গোপন সূত্ৰৰ পৰা পোৱা তথ্যৰ ভিত্তিত চলোৱা অভিযানতহে গ্ৰেপ্তাৰ হয় ৰেজ্জাক।

ইফালে পৰিয়ালৰ লোকে ঘটনা সন্দৰ্ভত সাংবাদিকৰ আগত কয়, ‘আমি ন্যায় বিচাৰিছো। অতি শীঘ্ৰে অভিযুক্তই শাস্তি পোৱাটো বিচাৰো। লম্পটজনৰ বিৰুদ্ধে কঠোৰৰ পৰা কঠোৰতম শাস্তি প্ৰদানৰ ব্যৱস্থা কৰিবলৈ চৰকাৰক আহ্বান জনাইছো’।