হিন্দুক অত্যাচাৰ কৰাৰ পৰিণতি! বাংলাদেশী নাগৰিকক আতিথ্য প্ৰদান নকৰাৰ সিদ্ধান্ত বৰাকৰ হোটেল মালিক সন্থাৰ

বাংলাদেশী নাগৰিকক আতিথ্য প্ৰদান নকৰাৰ সিদ্ধান্ত গ্ৰহণ কৰিছে বৰাক উপত্যকাৰ হোটেল আৰু ৰেস্তোঁৰাৰ মালিকসকলে। বাংলাদেশত হিন্দু আৰু অন্যান্য সংখ্যালঘুৰ ওপৰত চলি থকা অত্যাচাৰ বন্ধ নোহোৱালৈকে কোনো বাংলাদেশী নাগৰিকক আতিথ্য নিদিযয়ে বৰাকৰ হোটেল-ৰেস্তোঁৰা সমূহে।

বৰাক ভেলী হোটেল এণ্ড ৰেষ্টুৰেণ্ট এছ’চিয়েশ্যনৰ সভাপতি বাবুল ৰায়ে শুকুৰবাৰে সাংবাদিকৰ আগত কয়, ‘বাংলাদেশৰ হিন্দু আৰু অন্যান্য সংখ্যালঘুৰ পৰিস্থিতি অতি শোচনীয়। এই কথা আমি কোনো ধৰণে মানি ল’ব নোৱাৰো। গতিকে আমি সিদ্ধান্ত লৈছো যে বৰাক উপত্যকাৰ তিনিখন জিলাত কোনো বাংলাদেশী নাগৰিকক আতিথ্য নিদিওঁ। এইটোৱেই আমাৰ প্ৰতিবাদৰ মাধ্যম।’

লগতে তেওঁ কয়, ‘বাংলাদেশৰ জনসাধাৰণে দেশৰ স্থিতিশীলতা পুনৰ ঘূৰাই আনিব লাগিব। পৰিস্থিতিৰ উন্নতি হ’লে আমি এই সিদ্ধান্ত পুনৰ বিবেচনা কৰিব পাৰো।’

কিছুদিন পূৰ্বে বজৰং দলে বৰাক উপত্যকাৰ শিলচৰত চলি থকা গ্ল’বেল এক্সপ’ত বাংলাদেশী সামগ্ৰী বিক্ৰীৰ বাবে স্থাপন কৰা দুটা ষ্টল বন্ধ কৰাৰ দাবী জনাইছিল। উদ্যোক্তাসকলেও তেওঁলোকৰ দাবী মানি লৈছিল।

বজৰং দলৰ প্ৰতিবাদকাৰীয়ে শিলচৰস্থিত বাংলাদেশ ভিছা চেণ্টাৰতো উপস্থিত হৈ চাইনবৰ্ডৰ পৰা ‘বাংলাদেশ’ শব্দটো আঁতৰাবলৈ দাবী জনায়।

উল্লেখ্য যে বৰাক উপত্যকা অসমৰ কাছাৰ, শ্ৰীভূমি (পূৰ্বতে কৰিমগঞ্জ) আৰু হাইলাকান্দি তিনিখন জিলাৰে গঠিত। বাংলাদেশে এই অঞ্চলৰ সৈতে ১২৯ কিলোমিটাৰ দৈৰ্ঘ্যৰ সীমা ভাগ কৰে।