উজানবজাৰৰ চাঞ্চল্যকৰ হত্যাকাণ্ডৰ নতুন মোৰ; লতাশিল আৰক্ষীয়ে আটক কৰিলে তিনিজনক

বুধবাৰে সংঘটিত হোৱা উজানবজাৰৰ কিশোৰীৰ চাঞ্চল্যকৰ হত্যাকাণ্ডই নতুন মোৰ লৈছে।

ডিম্পল কুমাবট হত্যাকাণ্ডৰ সৈতে জড়িত থকাৰ সন্দেহত লতাশিল আৰক্ষীয়ে তিনিজনক আটক কৰিছে।

আটক কৰা কেইজন ক্ৰমে জেঠায়েকৰ পুত্ৰ আশীক গুপ্তা, তেওঁৰ বন্ধু জিতু শৰ্মা আৰু কৰণ।

ঘৰত কোনো নথকাৰ সুযোগ লৈ হত্যা কৰাৰ সন্দেহ কৰিছে আৰক্ষীয়ে।

ইতিমধ্যে আটকাধীন লোককেইজনক সোধা-পোছা অব্যাহত ৰাখিছে আৰক্ষীয়ে।

উল্লেখযোগ্য যে মহানগৰীৰ উজানবজাৰত সংঘটিত হৈছে এই নৃশংস হত্যাকাণ্ড। বুধবাৰে দিনৰ ১১:৩০ বজাৰ পৰা ১২ বজাৰ ভিতৰত সংঘটিত হৈছিল এই হত্যাকাণ্ড।

ৰেষ্টুৰেন্টৰ কামৰ বাবে পিতৃ-মাতৃ পুৱাতেই ঘৰৰ পৰা ওলাই গৈছিল আৰু সম্পৰ্কীয় ভাতৃৰ সৈতে ঘৰত আছিল ডিম্পল।

কিন্তু সম্পৰ্কীয় ভাতৃ গৰাকী চাহ খাবৰ বাবে দোকানৰ পৰা বিস্কুট আনিবলৈ যোৱাৰ সময়তে ঘৰত কোনো নথকাৰ সুযোগ লৈ ডিম্পলক হত্যা কৰা হয়।

বিচনাত তেজৰে তুমুৰুলি হৈ পৰি আছিল ডিম্পলৰ মৃতদেহ।

মৃতদেহৰ পিঠি, ডিঙি আৰু মূৰত আঘাতৰ চিন স্পষ্ট তথা পটাগুটি আৰু কুকাৰত তেজৰ দাগ লাগি আছিল বুলি জানিব পৰা গৈছে।

ৰাজস্থানৰ কুমাবটৰ পৰিয়ালটো মহানগৰীৰ উজানবজাৰৰ খাৰঘুলি যোৱা পথৰ এক ভাড়াঘৰত প্ৰায় ১০ বছৰ ধৰি বসবাস কৰি আহিছিল।

গুৱাহাটী ক্লাৱত এঞ্জেলছ অৱ গডছ স্কুলৰ সপ্তম শ্ৰেণীৰ ছাত্ৰী আছিল মৃত ডিম্পল কুমাবট।