শিক্ষামন্ত্ৰীৰ পদত্যাগৰ দাবীত দেশজুৰি আন্দোলন : ককৰোচ জনতা পাৰ্টিয়ে প্ৰকাশ কৰিলে ‘শিক্ষা ইস্তাহাৰ’

দেশৰ শিক্ষা খণ্ডত একেৰাহে পৰীক্ষা বিতৰ্ক আৰু প্ৰশ্নকাকত ফাদিল হোৱাৰ অভিযোগক লৈ সমগ্ৰ দেশতে তীব্ৰ প্ৰতিক্ৰিয়াৰ সৃষ্টি হৈছে। এনে পৰিস্থিতিত কেন্দ্ৰীয় শিক্ষামন্ত্ৰী ধৰ্মেন্দ্ৰ প্ৰধানৰ পদত্যাগৰ দাবীত দেশজুৰি এক বৃহৎ আন্দোলন আৰম্ভ কৰিছে যুৱ সংগঠন ককৰোচ জনতা পাৰ্টিয়ে। বৃহস্পতিবাৰে পুনেত এখন সংবাদমেল সম্বোধন কৰি সংগঠনটোৰ প্ৰতিষ্ঠাপক অভিজিৎ দিপকে ঘোষণা কৰে যে আন্দোলনৰ প্ৰথম পদক্ষেপ হিচাপে তেওঁলোকৰ তৰফৰ পৰা এখন বিশেষ শিক্ষা ইস্তাহাৰ প্ৰকাশ কৰা হৈছে।

সংবাদমেলত অভিজিৎ দিপকে কয় যে পুনে বিশ্ববিদ্যালয় চৌহদৰ পৰাই তেওঁলোকৰ এই দেশজুৰি আন্দোলনৰ শুভাৰম্ভ কৰা হৈছে। দেশৰ সংবিধান মানি সম্পূৰ্ণ শান্তিপূৰ্ণভাৱে এই আন্দোলন চলোৱা হ‘ব বুলি তেওঁ প্ৰকাশ কৰে। সংগঠনটোৰ মতে, আজি প্ৰকাশ পোৱা এই ইস্তাহাৰত মূলতঃ দেশৰ শিক্ষা ব্যৱস্থাৰ সমস্যাসমূহ দূৰ কৰাৰ ব্লু-প্ৰিন্ট অন্তৰ্ভুক্ত কৰা হৈছে। ইয়াৰ ভিতৰত প্ৰধান বিষয়বোৰ হৈছে প্ৰতিযোগিতামূলক আৰু নিযুক্তি পৰীক্ষাত প্ৰশ্নকাকত ফাদিল হোৱা সম্পূৰ্ণৰূপে বন্ধ কৰা, পৰীক্ষা শেষ হোৱাৰ নিৰ্দিষ্ট সময়ৰ ভিতৰতে ফলাফল ঘোষণা কৰা, প্ৰৱেশ পৰীক্ষা আৰু চৰকাৰী চাকৰিৰ নিযুক্তি প্ৰক্ৰিয়াত এশ শতাংশ স্বচ্ছতা অনা আৰু পৰীক্ষা নিয়ন্ত্ৰক সংস্থাসমূহৰ দায়বদ্ধতা বৃদ্ধি কৰা। ইয়াৰ উপৰিও পৰীক্ষা অনুষ্ঠিত কৰাত পলম হোৱা আৰু বিভিন্ন অনিয়মৰ বাবে দেশৰ কোটি কোটি ছাত্ৰ-ছাত্ৰীয়ে সন্মুখীন হোৱা মানসিক আৰু সামাজিক হাৰাশাস্তি অতি শীঘ্ৰে দূৰ কৰাৰ কথাও এই ইস্তাহাৰত উল্লেখ কৰা হৈছে।

অভিজিৎ দিপকে স্পষ্ট কৰি দিয়ে যে এই আন্দোলন কেৱল পুনেতে আৱদ্ধ নাথাকে। পুনেৰ পিছতে পৰ্যায়ক্ৰমে জয়পুৰ, লক্ষ্ণৌ, অমৃতসৰ আৰু বেংগালুৰুৰ দৰে ডাঙৰ চহৰলৈও এই প্ৰতিবাদ বিয়পি পৰিব। ইয়াৰ পিছত অহা বিশ জুন তাৰিখে দেশৰ বিভিন্ন প্ৰান্তৰ পৰা ছাত্ৰ আৰু যুৱ সমাজে ৰাজধানী দিল্লীৰ যন্তৰ মন্তৰত একত্ৰিত হ’ব। ককৰোচ জনতা পাৰ্টিৰ প্ৰতিষ্ঠাপকগৰাকীয়ে সকীয়াই দিয়ে যে দেশৰ এক কোটিৰো অধিক ছাত্ৰ-ছাত্ৰীৰ ভৱিষ্যত আজি বিপদাপন্ন আৰু ইয়াৰ বাবে একমাত্ৰ কেন্দ্ৰীয় শিক্ষামন্ত্ৰীগৰাকীয়েই দায়ী। তেওঁলোকে কয় যে যেতিয়ালৈকে শিক্ষামন্ত্ৰী ধৰ্মেন্দ্ৰ প্ৰধানে নিজৰ পদৰ পৰা পদত্যাগ নকৰে, তেতিয়ালৈকে তেওঁলোকে যন্তৰ মন্তৰৰ পৰা এক ইঞ্চিও আঁতৰি নাহে আৰু আন্দোলন প্ৰত্যাহাৰ নকৰে।

ইফালে, ছচিয়েল মিডিয়াত এই যুৱ আন্দোলনে ব্যাপক সঁহাৰি লাভ কৰাৰ পিছতে চৰকাৰৰ বিৰুদ্ধে ডিজিটেল দমনৰ অভিযোগ উত্থাপন কৰিছে সংগঠনটোৱে। যোৱা ছয় জুনত দিল্লীৰ যন্তৰ মন্তৰত তেওঁলোকে আহ্বান কৰা প্ৰথমটো প্ৰতিবাদত দেশৰ বিভিন্ন ৰাজ্যৰ পৰা বহু ছাত্ৰ-ছাত্ৰীয়ে অংশগ্ৰহণ কৰিছিল। চৰকাৰৰ বিৰুদ্ধে ক্ষোভ উজাৰি অভিজিতে দাবী কৰে যে তেওঁলোকে চৰকাৰৰ সৈতে মুকলি আলোচনাত বহিবলৈ সাজু, কিন্তু চৰকাৰে আলোচনাৰ পথ নিবাচি ককৰোচ জনতা পাৰ্টিৰ এক্স আৰু অন্যান্য ছচিয়েল মিডিয়া একাউণ্টসমূহ বন্ধ কৰি দিছে। তেওঁ লগতে কয় যে চৰকাৰে এনেদৰে যুৱ সমাজক আওকাণ কৰিব নোৱাৰে আৰু তেওঁলোকক ভুৱা বুলি নোকোৱাকৈ দেশৰ যুৱ সমাজে কি কি সমস্যাত ভুগিছে সেয়া বুজিবলৈ কেন্দ্ৰই চেষ্টা কৰা উচিত।