শিশুৰ স্বাস্থ্যৰ প্ৰতি লক্ষ্য ৰাখি মহাৰাষ্ট্ৰ চৰকাৰৰ ডাঙৰ সিদ্ধান্ত: বিদ্যালয়ৰ ৫০০ মিটাৰ ব্যসাৰ্ধত নিষিদ্ধ এনাৰ্জি ড্ৰিংক আৰু নিচাজাতীয় সামগ্ৰী  

মহাৰাষ্ট্ৰ চৰকাৰে ছাত্ৰ-ছাত্ৰীৰ স্বাস্থ্যৰ প্ৰতি লক্ষ্য ৰাখি এক ডাঙৰ সিদ্ধান্ত গ্ৰহণ কৰিছে। শুকুৰবাৰে চৰকাৰে ঘোষণা কৰে যে সমগ্ৰ ৰাজ্যখনৰ বিদ্যালয়সমূহৰ ৫০০ মিটাৰ ব্যাসাৰ্ধৰ ভিতৰত ষ্টিং এনাৰ্জি ড্ৰিংক আৰু আন যিকোনো নিচাজাতীয় সামগ্ৰীৰ বিক্ৰী সম্পূৰ্ণৰূপে বন্ধ কৰা হ’ব। এই পানীয়সমূহত থকা কিছুমান উপাদানে শিশুৰ স্বাস্থ্যৰ গুৰুতৰ ক্ষতি কৰিব পাৰে বুলি স্বাস্থ্য বিশেষজ্ঞসকলে মত প্ৰকাশ কৰিছে। তেওঁলোকৰ মতে, এনে শক্তিদায়ক পানীয়ত কেফেইন আৰু চেনিৰ পৰিমাণ অত্যাধিক থাকে যিটো শিশুৰ বাবে একেবাৰেই ভাল নহয়।

বিধানসভাৰ মজিয়াত ভাৰতীয় জনতা পাৰ্টিৰ বিধায়ক বিক্ৰম পাচপুতে উত্থাপন কৰা এক প্ৰশ্নৰ উত্তৰ দি খাদ্য আৰু ঔষধ প্ৰশাসন মন্ত্ৰী নৰহৰি ঝিৰৱালে এই নিষেধাজ্ঞাৰ কথা সদৰী কৰে। মন্ত্ৰীগৰাকীয়ে জনায় যে এই নিয়ম কঠোৰভাৱে পালন কৰিবলৈ বিভাগীয় কৰ্তৃপক্ষক নিৰ্দেশ দিয়া হৈছে। যদি কোনো ব্যক্তিয়ে বিদ্যালয়ৰ ৫০০ মিটাৰৰ ভিতৰত এনে পানীয় বা নিচাজাতীয় সামগ্ৰী বিক্ৰী কৰে, তেন্তে তেওঁৰ বিৰুদ্ধে তৎকালীনভাৱে কঠোৰ ব্যৱস্থা লোৱা হ’ব বুলি সকীয়াই দিয়া হৈছে।

ইয়াৰ উপৰিও, শক্তিদায়ক পানীয় খালে কি কি অপকাৰ হ’ব পাৰে, সেই বিষয়ে ছাত্ৰ-ছাত্ৰীসকলক বুজাবলৈ বিদ্যালয়সমূহক সজাগতামূলক কাৰ্যসূচী হাতত ল’বলৈ চৰকাৰে আহ্বান জনাইছে। আনহাতে, বিধায়ক ৰাহুল কুল আৰু বৰুণ ছৰদেশায়েও ১৮ বছৰৰ অনুৰ্ধৰ শিশুৱে যাতে এনে সামগ্ৰী সহজে নাপায়, তাৰ বাবে চৰকাৰক কঠোৰ পদক্ষেপ ল’বলৈ অনুৰোধ জনায়। মন্ত্ৰীগৰাকীয়ে সকলোকে আশ্বাস দিছে যে এই নিয়ম ফলপ্ৰসূভাৱে প্ৰযোজ্য কৰাৰ লগতে বিদ্যালয় পৰ্যায়ত সজাগতা বৃদ্ধিৰ বাবে চৰকাৰে সকলো প্ৰয়োজনীয় ব্যৱস্থা গ্ৰহণ কৰিব।