জম্মু-কাশ্মীৰৰ সন্ত্ৰাসবাদীৰ আক্ৰমণত আহত-নিহতৰ পৰিয়ালৰ কান্দোন : মোদী চৰকাৰ এতিয়াও উদযাপনত ব্যস্ত

যোৱা দেওবাৰে মোডী চৰকাৰৰ শপত গ্ৰহণৰ সময়ত জম্মু-কাশ্মীৰত তীৰ্থযাত্ৰীৰ এখন বাছত আক্ৰমণ চলাইছিল উগ্ৰপন্থীয়ে। এই ঘটনাত ৯ জন লোকৰ মৃত্যু হয় লগতে প্ৰায় ৩৩ জন লোক আহত হয়।

এই ঘটনাৰ পিছত মঙলবাৰে নিশা পুনৰ জম্মু-কাশ্মীৰত সংঘটিত হয় দুটা সন্ত্ৰাসবাদী আক্ৰমণ। এই আক্ৰমণত এজন জোৱানৰ মৃত্যু হয়। লগতে আহত হয় ৫ জন জোৱান আৰু এজন আৰক্ষী বিষয়া।

এই ঘটনাক লৈ নৰেন্দ্ৰ মোডীক আক্ৰমণ কৰে ৰাহুল গান্ধীয়ে।

নিজৰ এক্স হেণ্ডেলত ৰাহুল গান্ধীয়ে লিখিছে, ‘নৰেন্দ্ৰ মোডী এতিয়া অভিনন্দন বাৰ্তাৰ উত্তৰ দিয়াত ব্যস্ত। আনকি জম্মু-কাশ্মীৰত সংঘটিত সন্ত্ৰাসবাদী আক্ৰমণত নিৰ্মমভাৱে নিহত হোৱা শ্বহীদসকলৰ পৰিয়ালৰ কান্দোনো শুনা নাই। যোৱা ৩ দিনত ৰিয়াছি, কাঠুৱা আৰু ডোডাত সংঘটিত হৈছে ৩টা পৃথক সন্ত্ৰাসবাদী ঘটনা। কিন্তু প্ৰধানমন্ত্ৰী এতিয়াও উদযাপনত ব্যস্ত।”

ইফালে কংগ্ৰেছৰ মুখপাত্ৰ পৱন খেৰাওৱেও মোডী চৰকাৰক লক্ষ্য কৰি কয় যে, প্ৰধানমন্ত্ৰী নৰেন্দ্ৰ মোডী আৰু তেওঁৰ এন ডি এ চৰকাৰৰ শপত গ্ৰহণৰ সময়তে জম্মু-কাশ্মীৰৰ ৰিয়াছি জিলাত তীৰ্থযাত্ৰীসকলে ভয়ংকৰ সন্ত্ৰাসবাদী আক্ৰমণৰ সন্মুখীন হ’বলগীয়া হয়। ৯ জন বহুমূলীয়া প্ৰাণ হেৰুৱাইছে, ৩৩ জন গুৰুতৰভাৱে আহত। কিন্তু তথাপিও প্ৰধানমন্ত্ৰীৰ পৰা কোনো সঁহাৰি পোৱা নাই।”