মাতৃ ব্যস্ত আছিল মোবাইল ফোনত : গমেই নাপালে, পানীত ডুবি মৃত্যু সন্তানৰ

মোবাইল ফোনেই হ’ল কাল। মোবাইলৰ নিচাই মাতৃৰ বুকুৰ পৰা চিৰদিনৰ বাবে কাঢ়ি নিলে বুকুৰ সন্তানক।  

ঘটনা অনুসৰি এখন ৱাটাৰ পাৰ্কলৈ নিজৰ সন্তানক লৈ আনন্দ বিনোদনৰ বাবে গৈছিল এগৰাকী মাতৃ। কিন্তু পাৰ্কত গৈ সন্তানে খেলি থকাৰ সময়তে নিজৰ মোবাইল ফোনত ব্যস্ত হৈ পৰে মাতৃগৰাকী। 

সন্তানে পানীত খেলি থকাৰ সময়ত দায়িত্বহীনভাবে দীৰ্ঘসময়ত মোবাইলতে নিজৰ দৃষ্টি আৱদ্ধ কৰি ৰাখে মাতৃগৰাকীয়ে।  মোবাইলৰ নিচাত পানীত খেলি থকা সন্তানৰ কথা পাহৰি গৈছিল মহিলাগৰাকীয়ে। 

এই মৰ্মান্তিক ঘটনা সংঘটিত হৈছে আমেৰিকাৰ টেক্সাছৰ এল পাছো অঞ্চলৰ কেম্প কোহেন ৱাটাৰ পাৰ্কত। জানিব পৰা মতে, ৩৫ বছৰীয়া মহিলাগৰাকীৰ নাম জেছিকা উইভাৰ।  

মহিলাগৰাকীৰ এই গাফিলতিৰ বাবে তেওঁক কাঠগড়াত থিয় কৰোৱা হৈছে। কিন্তু মহিলাগৰাকীৰ অধিবক্তাই আদালতত যুক্তি দি কয় যে পাৰ্ক খনৰ নিৰাপত্তাৰ দায়িত্বত থকা কৰ্মচাৰী সকলৰ গাফিলতিৰ বাবেহে এই দুৰ্ভাগ্যজনক কাণ্ড সংঘটিত হৈছে। 

আনহাতে নিজৰ সন্তানক দয়িত্বহীন ভাবে পানীত এৰি দিয়াৰ বাবে মাতৃগৰাকীক এল পাছো কাউণ্টিৰ কাৰাগাৰলৈ নিক্ষেপ কৰা হৈছে। 

অভিযোগ অনুসৰি, ৱাটাৰ পাৰ্কত নিয়ম থাকিলেও সেই শিশুটিয়ে কোনো লাইফ ভেষ্ট পিন্ধা নাছিল। ছুইমিং পুলৰ নিয়ম অনুসৰি ৬ বছৰৰ কম বয়সৰ শিশুৰ লাইফ ভেষ্ট থাকিবই লাগিব। তেওঁলোকে যিমান সময় ছুইমিং পুলত থাকিব, সিমান সময় নজৰ দিয়াৰ বাবে এজন প্ৰাপ্তবয়স্কও থাকিব লাগিব।

কিন্তু প্ৰত্যক্ষদৰ্শীৰ অভিযোগ অনুসৰি ৱাটাৰ পাৰ্কত জেছিকাই ঘণ্টা ঘণ্টা ধৰি নিজৰ ফোনতে ব্যস্ত আছিল। ছেলফি লোৱাৰ লগতে ফটো তোলাত ব্যস্ত আছিল। আনকি প্ৰত্যক্ষদৰ্শীসকলে এই কথাও কৈছে যে ছুইমিং পুলৰ পৰা শিশুটিৰ নিথৰ দেহ তুলি অনাৰ কিছু সময় পূৰ্বেও জেছিকাই মোবাইলত ব্যস্ত হৈ গান গাই আছিল।