নেপালে এভাৰেষ্টত পৰিস্কাৰ কৰিলে ৩০০০ কেজি আবৰ্জনা
প্ৰদুষণৰ পৰা ৰেহাই পোৱা নাই পৃথিৱীৰ সৰ্বোচ্চ শৃংগ মাউণ্ট এভাৰেষ্ট। নেপাল চৰকাৰে এপ্ৰিলৰ ১৪ তাৰিখে মুকলি কৰা ‘সাগৰমঠ স্বচ্ছতা অভিযান’ৰ অংশ স্বৰূপে মাউণ্ট এভাৰেষ্টৰ পৰা প্ৰায় ৩০০০ কেজি গোটা আবৰ্জনা পৰিস্কাৰ কৰিছে।
হিমালয়ান টাইমছত প্ৰকাশ কৰা বাতৰি অনুসৰি দেশখনৰ পৰ্যটন বিভাগৰ মুখ্য সঞ্চালক দান্দু ৰাজ ঘিমিৰে ২০০০ কেজি আবৰ্জনা ওখালধুংগা আৰু ১০০০ কেজি আবৰ্জনা কাথমাণ্ডুলৈ পৰিষোধনৰ বাবে পঠোৱা বুলি কয়।
‘‘আমাৰ দল এতিয়া মাউণ্ট এভাৰেষ্টৰ বেচ কেম্পত স্বচ্ছতা অভিযানৰ বাবে উপস্থিত হৈছে। দলটোৰ বাবে খোৱা পানী, খাদ্য আৰু আশ্ৰয় স্থলকে আদি কৰি সকলো প্ৰয়োজনীয় ব্যৱস্থাৰ তাত আয়োজন কৰা হৈছে’’ ঘিমিৰে এনেদৰে সংবাদ মাধ্যমৰ আগত মত প্ৰকাশ কৰে।
পৰ্যটন বিভাগত প্ৰকাশ পোৱা তথ্য অনুসৰি এতিয়ালৈ অভিযানটোত প্ৰায় ২৩ মিলিয়ন নেপালী টকা ব্যয় হৈছে।
আনহাতে, পৰ্যটন বিভাগৰ সঞ্চালকে জনোৱা মতে অভিযানৰ কালছোৱাত প্ৰায় ৫০০০ কেজি গোটা আবৰ্জনা এভাৰেষ্টৰ বেচ কেম্পৰ পৰা পৰিস্কাৰ কৰাৰ লক্ষ্য কৰি লোৱা হৈছে। ইয়াৰ ভিতৰত ২০০০ কেজি আবৰ্জনা দক্ষিণ ক’ল অঞ্চলৰ পৰা আৰু ৩০০০ কেজি আবৰ্জনা প্ৰথম আৰু দ্বিতীয় কেম্পৰ পৰা পৰিস্কাৰ কৰাৰ লক্ষ্য নিৰ্ধাৰণ কৰা হৈছে।
উল্লেখযোগ্য যে, পৃথিৱীৰ ভিতৰত উচ্চতম শৃংগটো পৰিস্কাৰ কৰাৰ বাবে পোন প্ৰথমবাৰৰ বাবে সাংস্কৃতিক, পৰ্যটন, পৰিবেশ মন্ত্ৰালয়, নেপাল আৰ্মি, নেপাল পৰ্বতৰোহন সংস্থা, সাগৰমঠ প্ৰদুষণ নিয়ন্ত্ৰণ বোৰ্ড, নেপাল পৰ্যটন বিভাগে একেলগে কাম কৰিছে।