প্ৰবীণ ৰাজনীতিবিদ তথা প্ৰাক্তন কেন্দ্ৰীয় মন্ত্ৰী কবীন্দ্ৰ পুৰকায়স্থৰ পৰলোকপ্ৰাপ্তি

বৰাক উপত্যকাৰ ৰাজনীতিৰ আকাশৰ এক উজ্জ্বল নক্ষত্ৰৰ পতন ঘটিল। বিশিষ্ট শিক্ষাবিদ, প্ৰবীণ ৰাজনীতিবিদ তথা প্ৰাক্তন কেন্দ্ৰীয় মন্ত্ৰী কবীন্দ্ৰ পুৰকায়স্থই আজি শেষ নিশ্বাস ত্যাগ কৰে। বুধবাৰে সন্ধিয়া ৫:০৬ বজাত শিলচৰ মেডিকেল কলেজ হাস্পতালত তেওঁ মৃত্যুক সাৱটি লয়। মৃত্যুৰ সময়ত তেওঁৰ বয়স আছিল ৯৪ বছৰ। যোৱা কিছুদিন ধৰি তেওঁ বাৰ্ধক্যজনিত অসুস্থতাত ভুগি আছিল। বিশেষকৈ যোৱা এমাহ ধৰি তেওঁৰ স্বাস্থ্যৰ অধিক অৱনতি ঘটিছিল। উন্নত চিকিৎসাৰ বাবে তেওঁক শিলচৰ চিকিৎসা মহাবিদ্যালয়ৰ আই চি ইউত ভৰ্তি কৰা হৈছিল যদিও চিকিৎসকৰ সকলো প্ৰচেষ্টা ব্যৰ্থ কৰি তেওঁ ইহলীলা সম্বৰণ কৰে।

কবীন্দ্ৰ পুৰকায়স্থৰ জন্ম আৰু কৰ্মজীৱন আছিল অত্যন্ত অনুপ্ৰেৰণাদায়ক। তেওঁ নিজৰ কৰ্মজীৱন এগৰাকী বিশিষ্ট শিক্ষক হিচাপে আৰম্ভ কৰিছিল আৰু সমাজত এজন গুণী শিক্ষক হিচাপে যথেষ্ট সুনাম অৰ্জন কৰিছিল। পৰৱৰ্তী সময়ত তেওঁ সক্ৰিয় ৰাজনীতিত ভৰি দিয়ে। তেওঁক উত্তৰ-পূৰ্বাঞ্চলত ভাৰতীয় জনতা পাৰ্টিৰ ভেটি স্থাপন কৰা অন্যতম শক্তিশালী কাণ্ডাৰী হিচাপে গণ্য কৰা হয়। ৰাজনৈতিক জীৱনত তেওঁ সদায় এগৰাকী সৎ আৰু নিষ্ঠাবান ব্যক্তিত্ব হিচাপে পৰিচিত আছিল। অটল বিহাৰী বাজপেয়ী চৰকাৰৰ দিনত তেওঁ কেন্দ্ৰীয় মন্ত্ৰীসভাৰ সদস্য আছিল আৰু অতি দক্ষতাৰে যোগাযোগ বিভাগৰ দৰে গুৰুত্বপূৰ্ণ দায়িত্ব পালন কৰিছিল।

প্ৰবীণ ৰাজনীতিবিদগৰাকীৰ বিয়োগৰ খবৰ বিয়পি পৰাৰ লগে লগে সমগ্ৰ ৰাজ্যজুৰি শোকৰ ছাঁ পৰিছে। বিভিন্ন মহলে তেওঁৰ মৃত্যুত গভীৰ শোক প্ৰকাশ কৰিছে। ৰাজ্যৰ শিক্ষামন্ত্ৰী ড০ ৰনোজ পেগুৱে সামাজিক মাধ্যমৰ জৰিয়তে মৃতকৰ প্ৰতি শ্ৰদ্ধাঞ্জলি জ্ঞাপন কৰে। আনহাতে মুখ্যমন্ত্ৰী হিমন্ত বিশ্ব শৰ্মাই তেওঁৰ মৃত্যুত শোক প্ৰকাশ কৰি কয় যে কবীন্দ্ৰ পুৰকায়স্থ আছিল উত্তৰ-পূবত বিজেপি দলৰ এগৰাকী প্ৰতিষ্ঠাপক আৰু আদৰ্শ পুৰুষ। তেওঁৰ বিয়োগ অসমৰ ৰাজনৈতিক আৰু সামাজিক ক্ষেত্ৰখনৰ বাবে এক অপূৰণীয় ক্ষতি।