বিশিষ্ট সাহিত্যিক,কথাশিল্পী ইমৰান শ্বাহৰ ৰচনাৱলীৰ দ্বিতীয় খণ্ড উন্মোচন

অসম সাহিত্য সভাৰ প্ৰাক্তন সভাপতি, পদ্মশ্ৰী, বিশিষ্ট সাহিত্যিক, কথাশিল্পী ইমৰান শ্বাহৰ ৰচনাৱলীৰ দ্বিতীয় খণ্ডটো আজি উন্মোচন কৰা হয়।

গুৱাহাটীৰ আগশাৰীৰ প্ৰকাশন গোষ্ঠী কথাই প্ৰকাশ কৰি উলিওৱা গ্ৰন্থখন আনুষ্ঠানিকভাৱে উন্মোচন কৰে বীৰাঙ্গনা সতী সাধনী ৰাজ্যিক বিশ্ববিদ্যালয়ৰ উপাচাৰ্য ড° জ্যোতিপ্ৰসাদ শইকীয়াই।

গ্ৰন্থখন উন্মোচন কৰি ড° শইকীয়াই নৱপ্ৰজন্মৰ প্ৰতিগৰাকী সাহিত্য অনুৰাগীক শ্বাহৰ সাহিত্য অধ্যয়ন কৰি সৃষ্টিশীলতাৰ দিশত বাট বুলিবলৈ আহ্বান জনোৱাৰ লগতে শ্বাহৰ সৃষ্টিশীলতাই সমাজৰ প্ৰতিস্তৰৰ লোককে আহ্লাদিত কৰি আহিছে বুলি মন্তব্য কৰে।

ৰচনাৱলীৰ দ্বিতীয় খণ্ডটিত শ্বাহৰ দুখন গল্প গ্ৰন্থ, এখন অনুবাদ গ্ৰন্থ, কেইবালানিও গদ্য, বক্তৃতা, শিশু সাহিত্য, বাতৰি কাকতৰ স্তম্ভৰ লগতে আন বহুবোৰ প্ৰকাশিত লেখা গ্ৰন্থিত হৈছে।

উল্লেখযোগ্য যে ইয়াৰ পূৰ্বে প্ৰকাশ পোৱা ৰচনাৱলীৰ প্ৰথম খণ্ডটোও একেটা প্ৰকাশনে প্ৰকাশ কৰি উলিয়াইছিল। যিটো খণ্ডইও অসমীয়া পাঠকক ইমৰান শ্বাহৰ সাহিত্যকৃতিৰ সামগ্ৰীক অধ্যয়ন আৰু বিশ্লেষণৰ বাবে অনুপ্ৰাণিত কৰিছিল।