নিৰ্বাচনৰ আগত ধন বিলাই হাতে-লোটে ধৰা পৰিল ইউ পি পি এলৰ নেত্ৰী, আৰক্ষীয়ে জব্দ কৰিলে টকাৰ বাণ্ডিল

পোহৰ আহিছে বিজেপি মিত্ৰজোঁটৰ দল ইউ পি পি এলৰ নেতা-নেত্ৰীৰ লৈ ইটোৰ পিছত সিটোকৈ কুকাণ্ড। এইবাৰ কোকৰাঝাৰ লোকসভা সমষ্টিৰ অন্তৰ্গত চিৰাঙত ধন বিলাবলৈ গৈ আৰক্ষীৰ জালত পৰিল দলটোৰ নেত্ৰী আৰু তেখেতৰ এজন সহযোগী।

প্ৰাপ্ত তথ্য মতে,  চিৰাং জিলাৰ গৰুভাষাত ভোটগ্রহণৰ প্ৰাকমুহূৰ্তত এখন মটৰ চাইকেল লৈ ভোটাৰৰ মাজত টকা বিলাবলৈ গৈছিল দুয়ো।

এই খবৰ লাভ কৰাৰ পিছতে স্থানীয় লোক আৰু বিপিএফ দলৰ কেইজনমান কৰ্মীয়ে গৈ টকা বিলাই থকা অৱস্থাত ধৰা পেলাই ইউপিপিএলৰ ব্যক্তি দুগৰাকীক। তাৰপিছত বৃহৎ ধনৰ টোপোলা আৰু মটৰ চাইকেলসহ ব্যক্তি দুজনক স্থানীয় গৰুভাষা আৰক্ষী চকীত গতাই দিয়া হয়।

জানিব পৰা মতে, ভোটাৰৰ মাজত টকা বিলাই আৰক্ষীৰ জালত পৰা মহিলাগৰাকী হৈছে চিৰাং ব্লক ইউ পি পি এলৰ মহিলা কোষৰ নেতা ফ্রোৰেন্স ইছলাৰী। আৰু মহিলাগৰাকীৰ লগত যোৱা ব্যক্তিজন হৈছে গাঁওৰক্ষী বাহিনীৰ সম্পাদক বিজয় মুছাহাৰী।

এতিয়া এই কাৰ্যৰ পিছতে উত্থাপন হৈছে না না প্ৰশ্নৰ। ধনৰ বিনিময়ত ভোট বিচৰাৰ ৰাজনীতি কৰিছে নেকি ইউপিপিএল তথা বিজেপি মিত্ৰজোঁটে? এই কাৰ্যক তীব্ৰ গৰিহণা দিছে স্থানীয় লোক আৰু বিপিএফ দলে।