এমাহৰ ভিতৰত এৰিব লাগিব চৰকাৰী আৱাসগৃহ : মহুৱা মৈত্ৰলৈ জাননী লোকসভাৰ

সাংসদ পদৰ পৰা বৰ্খাস্ত হোৱাৰ পিছত এতিয়া চৰকাৰী বাংলো খালী কৰিবলৈ নিৰ্দেশ দিয়া হৈছে মহুৱা মৈত্ৰক। 

সূত্ৰ অনুসৰি প্ৰাক্তন সাংসদ তথা তৃণমূল কংগ্ৰেছ নেতাগৰাকীয়ে এই জাননী লাভ কৰাৰ পিছত অহা ৩০ দিনৰ ভিতৰত চৰকাৰী বাসগৃহ খালী কৰিব লাগিব। 

উৎকোচৰ বিনিময়ত সংসদত প্ৰশ্ন কৰাৰ অভিযোগত লোকসভাৰ পৰা বহিষ্কাৰ হোৱাৰ পিছত এতিয়া উচ্চতম ন্যায়ালয়ৰ কাষ চাপিছে মহুৱা মৈত্ৰই। সাংসদ পদৰ পৰা বৰ্খাস্ত কৰাৰ সিদ্ধান্তক আদালতত প্ৰত্যাহ্বান জনাইছে তেওঁ। 

শুকুৰবাৰে লোকসভাই মহুৱাৰ বিৰুদ্ধে উত্থাপিত অভিযোগ সন্দৰ্ভত নৈতিকতা সমিতিৰ তদন্ত প্ৰতিবেদন গ্ৰহণ কৰে। প্ৰতিবেদনত মহুৱাক সাংসদ পদৰ পৰা বৰ্খাস্ত কৰাৰ পৰামৰ্শ দিয়া হৈছিল। এই প্ৰতিবেদনৰ ভিত্তিতেই মহুৱা মৈত্ৰক সংসদৰ পৰা বৰ্খাস্ত কৰে লোকসভাৰ অধ্যক্ষই।

ইয়াৰ কিছুদিনৰ পিছতেই সংসদৰ গৃহ নিৰ্মাণ সমিতিয়ে কেন্দ্ৰীয় গৃহ নিৰ্মাণ আৰু নগৰ পৰিক্ৰমা মন্ত্ৰালয়লৈ এখন পত্ৰ প্ৰেৰণ কৰি তৃণমূল নেত্ৰীগৰাকীক তেওঁৰ চৰকাৰী বাংলো খালী কৰিবৰ বাবে নিৰ্দেশ দিবলৈ কৈছে।