হিমন্ত বিশ্ব শৰ্মাৰ ঘৃণামূলক মন্তব্য! কঠোৰ পদক্ষেপৰ দাবীত আয়োগৰ ওচৰত অভিযোগ দাখিল তৃণমূলৰ

পশ্চিমবংগত বিধানসভা নিৰ্বাচনৰ পূৰ্বে ৰাজনৈতিক উত্তাপৰ মাজতে সৰ্বভাৰতীয় তৃণমূল কংগ্ৰেছে অসমৰ মুখ্যমন্ত্ৰী হিমন্ত বিশ্ব শৰ্মাৰ বিৰুদ্ধে ৰাজ্যৰ মুখ্য নিৰ্বাচনী বিষয়াক আনুষ্ঠানিক অভিযোগ দাখিল কৰিছে।

কোচবিহাৰত বিজেপিৰ হৈ প্ৰচাৰ চলাওঁতে হিমন্ত বিশ্ব শৰ্মাই নিৰ্বাচনী আচৰণ বিধি উলংঘা কৰি সাম্প্ৰদায়িকভাৱে বিভাজনকাৰী, প্ৰৰোচনামূলক আৰু মানহানিকাৰক মন্তব্য কৰা বুলি দলটোৱে অভিযোগ উত্থাপন কৰে।

শুকুৰবাৰে (১৭ এপ্ৰিল) মুখ্য নিৰ্বাচনী বিষয়ালৈ প্ৰেৰণ কৰা এখন পত্ৰত তৃণমূলে দাবী কৰিছে যে ১৬ এপ্ৰিলত কোচবিহাৰত এখন ৰাজহুৱা সভাত ভাষণ দি হিমন্ত বিশ্ব শৰ্মাই এনে কিছুমান মন্তব্য কৰিছিল যিয়ে ধৰ্মীয় বিভাজনৰ সৃষ্টি কৰিব পাৰে আৰু ভোটদানৰ পৰিৱেশ উত্তপ্ত তুলিব পাৰে।

পত্ৰখনত উল্লেখ কৰা হৈছে যে তেওঁৰ ভাষণত এটা নিৰ্দিষ্ট সম্প্ৰদায়ক লক্ষ্য কৰি ঘৃণনীয় ইংগিত আছিল আৰু মুখ্যমন্ত্ৰী মমতা বেনাৰ্জীৰ বিৰুদ্ধেও ভিত্তিহীন আৰু মানহানিকাৰক অভিযোগ উত্থাপন কৰিছে।

তৃণমূলে অভিযোগ কৰে যে এনে মন্তব্য কেৱল নিৰ্বাচনী আদৰ্শ আচৰণ বিধি উলংঘা কৰাই নহয়, ভাৰতীয় দণ্ডবিধি (আই পি চি), জনপ্ৰতিনিধি আইন (আৰ পি এ)কে ধৰি কেইবাখনো আইনৰ অধীনত অপৰাধ বুলিও গণ্য কৰিব পাৰি। সেয়ে হিমন্ত বিশ্ব শৰ্মাক কাৰণ দেখুৱাৰ জাননী প্ৰেৰণ কৰাৰ উপৰি তেওঁৰ বিৰুদ্ধে কঠোৰ প্ৰশাসনিক ব্যৱস্থা গ্ৰহণ কৰাৰ লগতে প্ৰয়োজন সাপেক্ষে এফআইআৰ দাখিল কৰিবলৈ দাবী উত্থাপন হৈছে।

নিৰ্বাচনৰ প্ৰাকমুহূৰ্তত এনেধৰণৰ ভাষণে ৰাজ্যৰ শান্তি-শৃংখলা বিঘ্নিত কৰিব পাৰে আৰু ই ভোটাৰক প্ৰভাৱিত কৰাৰ প্ৰয়াস বুলি উল্লেখ কৰা হৈছে। অৱশ্যে এই অভিযোগ সন্দৰ্ভত এতিয়ালৈকে বিজেপি বা হিমন্ত বিশ্ব শৰ্মাৰ কোনো আনুষ্ঠানিক প্ৰতিক্ৰিয়া প্ৰকাশ পোৱা নাই। এই ঘটনাক লৈ ৰাজনৈতিক মহলত নতুনকৈ বিতৰ্ক আৰম্ভ হৈছে।