প্ৰাক্তন প্ৰধান মন্ত্ৰী অটল বিহাৰী বাজপেয়ীৰ স্বাস্থ্যৰ গুৰুতৰ অৱনতি; সকলো কাম-কাজ এৰি দিল্লীলৈ মুখ্য মন্ত্ৰী সোণোৱাল

আজিৰ দিনটোৰ সকলো কাম-কাজ বাতিল কৰি দিল্লীলৈ উৰা মাৰিব অসমৰ মুখ্য মন্ত্ৰী সৰ্বানন্দ সোণোৱাল। ভাৰতৰ প্ৰাক্তন প্ৰধান মন্ত্ৰী অটল বিহাৰী বাজপেয়ীৰ স্বাস্থ্যৰ বুজ লোৱাৰ উদ্দেশ্যে দিল্লীলৈ ৰাওনা হ’ব সোণোৱাল।

উল্লেখ্য যে প্ৰাক্তন প্ৰধান মন্ত্ৰী অটল বিহাৰী বাজপেয়ীৰ স্বাস্থ্যৰ গুৰুতৰ অৱনতি ঘটাৰ বাবে আজি ভাৰতীয় জনতা পাৰ্টী চমুকৈ বিজেপিৰ সকলো কাৰ্যসূচী বাতিল কৰা হোৱা বুলি জানিব পৰা গৈছে।  সম্প্ৰতি AIIMSত চিকিৎসাধীন হৈ থকা প্ৰাক্তন প্ৰধান মন্ত্ৰীগৰাকীৰ অৱস্থা অতি সংকটজনক বুলি ইতিমধ্যে চিকিৎসালয় কৰ্তৃপক্ষই জানিবলৈ দিয়ে।

মন কৰিবলগীয়া যে বিগত ৯ সপ্তাহে দিল্লীৰ AIIMSত চিকিৎসাধীন হৈ থকা প্ৰাক্তন প্ৰধান মন্ত্ৰীগৰাকী বিগত ৩ দিন ধৰি ভেণ্টিলেশ্যনত চিকিৎসাধীন হৈ আছে।

মূল্যবোধৰ ৰাজনীতিৰ অন্যতম বাটকটীয়া তথা ভাৰতীয় জনতা পাৰ্টীৰ হৈ দুবাৰকৈ দেশৰ প্ৰধান মন্ত্ৰী হোৱা বাজপেয়ীৰ স্বাস্থ্যৰ বুজ ল’বলৈ আজি পুৱা ৬.৩০ বজাত AIIMSত উপস্থিত হয় উপ-ৰাষ্ট্ৰপতি ভেংকায়া নাইডু। ইফালে কালি নিশাতে দেশৰ প্ৰধান মন্ত্ৰী নৰেন্দ্ৰ মোদীয়ে প্ৰাক্তন প্ৰধান মন্ত্ৰীজনৰ খবৰ লৈ আহিছিল।