আজি কোচিত পৰাজয়ৰ ধাৰা ভংগৰ লক্ষ্যৰে কেৰালা ব্লাষ্টাৰ্ছৰ মুখামুখি হ’ব নৰ্থ-ইষ্ট য়ুনাইটেড

আই এছ এলৰ চলিত ছিজনৰ এখন খেলত আজি কোচিত কেৰালা ব্লাষ্টাৰ্ছ এফ চিৰ মুখামুখি হ’ব নৰ্থ-ইষ্ট য়ুনাইটেড।

কোচিৰ জৱাহৰলাল নেহৰু ষ্টেডিয়ামত হ’বলগীয়া খেলখনত জয়ৰ বাবে যুজ দিব নৰ্থ-ইষ্ট য়ুনাইটেডে।

নৰ্থ-ইষ্ট য়ুনাইটেড বৰ্তমান পইণ্ট তালিকাত ষষ্ঠ স্থানত থকাৰ বিপৰীতে ৯ নং স্থানত আছে কেৰালা ব্লাষ্টাৰ্ছ।

নৰ্থ-ইষ্ট য়ুনাইটেডৰ প্ৰশিক্ষক ৰবাৰ্ট জাৰ্নিয়ে দলক শীৰ্ষ চাৰিটা স্থানত উপনীত কৰাৰ ক্ষেত্ৰত খেলৰ ফলাফল নিৰ্ণায়ক হ’ব বুলি মন্তব্য কৰে।

উল্লেখযোগ্য যে, অপৰাজেয়ভাৱে ছিজন আৰম্ভ কৰা নৰ্থ-ইষ্ট য়ুনাইটেডে অন্তিম চাৰিখন খেলত জয়ৰ মুখ দেখিবলৈ সক্ষম হোৱা নায়।

তাৰকা খেলুৱৈ জিয়ানৰ অনুপস্থিতি প্ৰশিক্ষক জৰ্নিৰ বাবে চিন্তাৰ কাৰণ হৈ উঠিছে।

চলিত ছিজনত নৰ্থ-ইষ্ট য়ুনাইটেডে আজি ৯ নং খেলত অংশগ্ৰহণ কৰাৰ বিপৰীতে কেৰালা ব্লাষ্টাৰ্ছে ১০ নং খেলত অংশ ল’ব।

নৰ্থ-ইষ্ট য়ুনাইটেডে বিজয়ৰ ধাৰালৈ উভতিব বিচৰাৰ ধৰণে কেৰালায়ো আজিৰ খেলখনত জয়ৰ লক্ষ্যৰে খেলপথাৰত অৱতীৰ্ণ হ’ব বুলি প্ৰশিক্ষকে সংবাদ মেলত মন্তব্য কৰে।