চকলাঘাটত নাগৰিকত্ব সংশোধনী বিধেয়ক বাতিলৰ দাবীৰে নাগৰিক ঐক্যমঞ্চৰ জোঁৰ সমদল

জাতিধ্বংসী নাগৰিকত্ব সংশোধনী বিধেয়ক ২০১৬’ গৃহীত কৰি কেন্দ্ৰৰ বিজেপি চৰকাৰে  বাংলাদেশী লোকক নাগৰিকত্ব প্ৰদান কৰাৰ যো-জা চলাই থকা কাৰ্যৰ তীব্ৰ প্ৰতিবাদ জনাই সোমবাৰে নিশা নগাঁও জিলাৰ হাতীচোঙৰ চকলাঘাটত এক প্ৰতিবাদী জোঁৰ সমদল  উলিওৱা হয়।

নাগৰিক ঐক্যমঞ্চৰ উদ্যোগত নগাঁও জিলাৰ হাতীচোং মৌজাৰ কুঁজীডাহ, নমাটি, খালৈগাঁও, কাকমাৰী, মাজগাওঁ, চকলাঘাট, চমুৱাগাঁও, জামগুৰি আদি স্থানৰ পৰা অহা শতাধিক যুৱকৰ লগতে হাতীচোং আঞ্চলিক ছাত্ৰসন্থা , সদৌ অসম গ্ৰামীন শ্ৰমিক সন্থা,চকলাঘাট শাখা সাহিত্য সভা আদি বিভিন্ন দল-সংগঠনৰ প্ৰতিনিধিয়ে সমদলত অংশ লয়।

এই জোঁৰ সমদলটো চকলাঘাট চাৰিআলিৰ পৰা আৰম্ভ হৈ অঞ্চলৰ চুকে-কোণে সোমাই ৰাইজৰ মাজত জাতিধ্বংসী বিধায়কখনৰ বিৰুদ্ধে সজাগতাৰ সৃষ্টিৰ প্ৰয়াস কৰে।

আনহাতে, হাতে হাতে জোঁৰ লৈ প্ৰতিবাদকাৰী সকলে দবা-শংখ বজাই “নাগৰিকত্ব সংশোধনী বিধেয়ক বাতিল কৰক, সৰ্বানন্দ সোণোৱাল মূর্দাবাদ, নৰেন্দ্ৰ মোদী মূর্দাবাদ” “হিমন্ত বিশ্ব শৰ্মা মূৰ্দাবাদ” আদি শ্ল’গানেৰে অঞ্চলটোৰ  আকাশ বতাহ কঁপাই তোলে ৷

প্ৰতিবাদী কাৰ্যসূচীৰ আৰম্ভণিতে বিশিষ্ট শিল্পী গম্ভীৰ শইকীয়া,অসম আন্দোলনৰ অগ্ৰণী নেতা দেৱ কুমাৰ বৰা ,অগপৰ কেন্দ্ৰীয় মহিলা পৰিষদৰ কাৰ্যকৰী সভানেত্ৰী মামনি বৰা,সদৌ অসম গ্ৰামীণ শ্ৰমিক সন্থাৰ ৰাজ্যিক সম্পাদক অৰূপ কুমাৰ মহন্ত আৰু নগাঁও জিলা ছাত্ৰ সন্থাৰ প্ৰাক্তন সভাপতি অভিজিৎ দাসে বক্তব্য ৰাখি বিধেয়কখনৰ বিৰুদ্ধে ৰাইজক ঐক্যভাৱে সংগ্ৰাম আগবঢ়াই নিবলৈ আহ্বান জনায়।