চৰকাৰ তথা জিলা প্ৰশাসনৰ কঠোৰ নিৰ্দেশৰ পাছতো শিৱসাগৰত বন্ধ পালন

৪৬ টাকৈ জাতীয় সংগঠনে আজি আহ্বান জনোৱা ১২ ঘণ্টীয়া অসম বন্ধৰ সৰ্বাত্মক প্ৰভাৱ দেখা গ’ল শিৱসাগৰত। পুৱাই নগৰৰ বিভন্ন স্থানৰ লগতে ইয়াৰ উপকণ্ঠ অঞ্চলত বন্ধ সমৰ্থক সকলে টায়াৰ জ্বলাই প্ৰতিবাদ সাব্যস্ত কৰাৰ লগতে ৰাজপথলৈ ওলাই আহে। বন্ধৰ সময়ত আজি শিৱসাগৰৰ সকলো দোকান পোহাৰ, চৰকাৰী বেচৰকাৰী  অনুষ্ঠান প্ৰতিষ্ঠান, বিদ্যালয় আদি সম্পূৰ্ণ ৰূপে বন্ধ থকাৰ লগতে অসম ৰাজ্যিক পৰিবহণ নিগমৰ যান-বাহনৰ লগতে বেচৰকাৰী আৰু ব্যক্তিগত  যান-বাহনৰ চলাচল সম্পূৰ্ণ বন্ধ হোৱা দেখা যায়।

উল্লেখ্য যে, সোমবাৰে শিৱসাগৰ জিলা প্ৰশাসনে বিভিন্ন বিদ্যালয় মহাবিদ্যালয় তথা চৰকাৰী কাৰ্য্যালয়লত শিক্ষক কৰ্মচাৰীক উপস্থিত থাকিবলৈ এক কঠোৰ নিৰ্দেশ জাৰি কৰি পত্ৰ  প্ৰেৰণ কৰিছিল যদিও আজি বন্ধৰ সময়ত বিদ্যালয় তথা কাৰ্য্যালয়ত শিক্ষক-কৰ্মচাৰীৰ উপস্থিতি তেনেই সেৰেঙা হোৱা দেখা গ’ল।  কাৰ্যালয় সমুহৰ প্ৰৱেশদ্বাৰ খোলা থাকে  যদিও দুই তিনি জন  কৰ্মচাৰীৰ বাহিৰে প্ৰায় সংখ্যক কৰ্মচৰী অনুপস্থিত থাকে।

ইফালে সমগ্ৰ চহৰৰ দোকান-পোহাৰ সম্পূৰ্ণ ৰূপে থকা দেখা যায়। চৰকাৰে অসম বন্ধৰ সময়ত দোকান বন্ধ ৰাখিলে দোকানৰ বাণিজ্য অনুজ্ঞাপত্ৰ (trade license) বাতিল কৰিব বুলি ভাবুকি দিয়াৰ স্বত্বেও জনসাধাৰণে নিজ ইচ্ছাৰে নিজৰ নিজৰ দোকান-পোহাৰ বন্ধ কৰি ৰাখি ৪৬ টা জাতীয় সংগঠনে আহ্বান জনোৱা বন্ধৰ প্ৰতি সমৰ্থন আগবঢ়ায়।

দুই এটা সৰু সুৰা অ-প্ৰতিকৰ  ঘটনাৰ বাহিৰে শিবসাগৰত বন্ধ শান্তিপূৰ্ণভাৱে সম্পূৰ্ণ হয়। সমগ্ৰ শিৱসাগৰবাসীয়ে এই জাতি-ধ্বংসী বিধেয়কখনৰ বিৰোধিতা কৰি স্বতস্ফুৰ্ত ভাৱে বন্ধ পালন কৰা দেখা গৈছে।