জগন্নাথৰ ৰথ যাত্ৰাৰ বাবে আজি গুৱাহাটীত যান-বাহন আৰক্ষীৰ পথ নিৰ্দেশনা জাৰি
দেওবাৰে (৭ জুলাই) গুৱাহাটীত জগন্নাথ ৰথ যাত্ৰাৰ পৰিপ্ৰেক্ষিতত মহানগৰ যান-বাহন আৰক্ষীয়ে মহানগৰীৰ কেইবাটাও অঞ্চলত এক নিৰ্দেশনা জাৰি কৰিছে। দুপৰীয়া ২ বজাৰ পৰা শোভাযাত্ৰাৰ বাবে গুৱাহাটী মহানগৰীৰ বিভিন্ন পথত যানজঁটৰ সৃষ্টি হোৱাৰ সম্ভাৱনা আছে।
যানজঁটৰ বাবে জি এছ ৰোড (পল্টন বজাৰৰ পৰা ছয়মাইললৈ), আৰ পি ৰোড (গণেশগুৰি ফ্লাই অভাৰৰ পৰা গণেশগুৰি গণেশ মন্দিৰলৈ), কাহিলীপাৰা ৰোড (গণেশগুৰি গণেশ মন্দিৰৰ পৰা দক্ষিণ গাঁওলৈ), বেলতলা-বশিষ্ঠ পথ (লাষ্ট গেটৰ পৰা বশিষ্ঠ চাৰিআলিলৈ) আৰু ত্ৰিপুৰা গলি (বালুঘাট)ৰ পৰা ছয় মাইল উৰণীয়া সেতুলৈকে প্ৰভাৱিত হব বুলি গুৱাহাটীৰ যান-বাহন বিভাগৰ উপ-আয়ুক্তই যান-বাহন নিৰ্দেশনাত প্ৰকাশ কৰিছে।
লগতে পঢ়কঃ অৱশেষত উদ্ধাৰ হ’ল মহানগৰীৰ জ্যোতিনগৰত নলাত উটি যোৱা কণমানি অবিনাশৰ মৃতদেহ
আনহাতে, ইয়াৰ প্ৰভাৱ পৰাৰ সম্ভাৱনা থকা আন পথসমূহৰ ভিতৰত আছে ভিআইপি ৰোড (ছয় মাইল ফ্লাই অভাৰৰ পৰা নাৰেংগী তিনিআলি), পাঞ্জাবাৰী ৰোড (ছয় মাইলৰ পৰা বতাহঘুলিলৈ), ৰিফাইনেৰী ৰোড (১ নং শালবাৰীৰ পৰা গোপালনগৰ ত্ৰিজাংচনলৈ), এম আৰ ডি ৰোড ( বামুনীমৈদাম ৰেলৱে কলনীৰ পৰা হাতীগড় চাৰিআলি), মাদাৰ টেৰেছা ৰোড (গীতা মন্দিৰৰ পৰা জুৰোড তিনিআলি), এ টি ৰোড (পল্টন বজাৰৰ পৰা উলুবাৰী চাৰিআলিলৈ) আৰু বি কে কাকতি ৰোড (উলুবাৰী চাৰিআলিৰ পৰা আৰ্য নগৰলৈ)।
তদুপৰি, এ কে আজাদ ৰোড (লালগনেশৰ পৰা নেপালী মন্দিৰলৈ), এ কে দেৱ পথ (ফটাশিল চাৰিআলিৰ পৰা ধীৰেণপাৰালৈ), এম ডি শ্বাহ ৰোড (নেপালী মন্দিৰৰ পৰা গধূলি বজাৰলৈ), এম জি ৰোড/ডি জি ৰোড (গুৱাহাটি উচ্চ ন্যায়ালয়ৰ পৰা মালিগাঁও চাৰিআলিলৈ) আৰু এছ জে ৰোড (কুমাৰপাৰা পাঁচআলিৰ পৰা আঠগাঁও দলং) পথসমূহো প্ৰভাৱিত হোৱাৰ সম্ভাৱনা আছে বুলি জানিবলৈ দিয়ে।
লগতে পঢ়কঃ মহিলা টি-২০ এছিয়া কাপৰ দল ঘোষণা বিচিচিআইৰ; দলত অসমৰ উমা ছেত্ৰী
গুৱাহাটী যান-বাহন আৰক্ষীয়ে মসৃণ যাতায়তৰ বাবে সাধাৰণ জনতাক ওপৰত উল্লেখ কৰা পথৰ অংশবোৰ যিমান পাৰে পৰিহাৰ কৰিবলৈ পৰামৰ্শ দিছে বুলি যান-বাহন নিৰ্দেশনাত লগতে কোৱা হৈছে।