মৰ্মান্তিক! সহপাঠীৰ অত্যাচাৰৰ বলি হৈ চৰম সিদ্ধান্ত ল’লে ৯ বছৰীয়া ছাত্ৰীয়ে

ৰাজস্থানৰ জয়পুৰত সংঘটিত এক হৃদয়বিদাৰক ঘটনাই বহু লোকক স্তম্ভিত কৰি তুলিছে। এখন আগশাৰীৰ বিদ্যালয়ৰ চতুৰ্থ শ্ৰেণীত পঢ়ি থকা ৯ বছৰীয়া কিশোৰী আমাইয়াৰাই যোৱা ১ নৱেম্বৰ তাৰিখে স্কুলৰ চতুৰ্থ মহলাৰ পৰা জঁপিয়াই আত্মহত্যা কৰে।

আমাইয়াৰাৰ পিতৃ-মাতৃৰ মতে, বিদ্যালয়ত তেওঁৰ সহপাঠী সকলে আমাইয়াৰাৰ ওপৰত বাৰে বাৰে মানসিক অত্যাচাৰ চলাইছিল। ইয়াৰ ভিতৰত এনে কিছু মন্তব্যও আছিল যিয়ে তাইক অতি বেছি অস্বস্তিত পেলাইছিল।

তেওঁলোকে দাবী কৰে যে বিগত এবছৰ ধৰি তেওঁলোকে এই সন্দৰ্ভত বহুবাৰ বিদ্যালয়ৰ শিক্ষক আৰু সমন্বয়কসকলৰ ওচৰত অভিযোগ জনাইছিল। কিন্তু তেওঁলোকৰ এই অভিযোগক আওকাণ কৰা হৈছিল বা সঠিকভাৱে গুৰুত্ব দিয়া হোৱা নাছিল।

আমাইয়াৰাৰ মাতৃ শিৱানী মীনাই এবছৰ আগতে কৰা এটা অডিঅ’ ৰেকৰ্ডিং দাখিল কৰিছে, য’ত আমাইয়াৰাই কান্দি কান্দি এই বুলি কাকূতি কৰা শুনা গৈছে: “মই স্কুললৈ যাব নিবিচাৰো… মোক পঠিয়াব নালাগে।” মাকে এই অডিঅ’টো শ্ৰেণী শিক্ষকক পঠিয়াইছিল, স্কুল কৰ্তৃপক্ষই সহায় কৰিব বুলি আশা কৰি।

এই মৰ্মান্তিক ঘটনাৰ পূৰ্বে চিচিটিভিৰ ফুটেজত দেখা গৈছে যে আমাইয়াৰাই দুবাৰকৈ শিক্ষকৰ ওচৰলৈ খোজ কাঢ়ি গৈছিল। কিন্তু চিচিটিভি ফুটেজত কোনো অডিঅ’ ৰেকৰ্ডিং নথকাৰ বাবে তাই কি কৈছিল সেয়া অজ্ঞাত। সাধাৰণতে CBSE-ৰ নিৰ্দেশনাৱলী অনুসৰি স্কুলৰ নিৰীক্ষণৰ বাবে স্থাপন কৰা চিচিটিভি কেমেৰাত অডিঅ’ ৰেকৰ্ডিং থকাটো বাধ্যতামূলক।

অভিযোগ উত্থাপন হৈছে যে ৫,০০০ তকৈ অধিক ছাত্ৰ-ছাত্ৰী থকা স্কুলখনত কোনো সুৰক্ষামূলক গ্ৰীল বা জাল নোহোৱাকৈ অতিৰিক্ত মহলা আছিল। চিবিএছইৰ নিৰ্দেশনা অনুসৰি চিচি টিভিত অডিঅ’ ৰেকৰ্ডিং নাছিল।

উপ-আয়ুক্ত ৰাজাৰ্ষী ৰাজ ভাৰ্মাই নিশ্চিত কৰিছে যে তেওঁলোকে অভিভাৱকৰ বক্তব্য গ্ৰহণ কৰিছে আৰু সকলো সবিশেষ পৰীক্ষা কৰি আছে। শীঘ্ৰেই জিলা শিক্ষা বিষয়াই অভিভাৱকৰ বক্তব্য আনুষ্ঠানিকভাৱে লিপিবদ্ধ কৰিব। তেওঁ উল্লেখ কৰে যে কেইজনমান ল’ৰা-ছোৱালীয়ে তেওঁক কৈছিল যে সেইদিনা আমাইয়াৰা স্কুললৈ আহিব নিবিচাৰিছিল, আৰু কিছুমান ছাত্ৰ-ছাত্ৰীয়ে আন ছাত্ৰ-ছাত্ৰীয়ে “বেয়া শব্দ” ব্যৱহাৰ কৰাৰ অভিযোগ কৰিছিল। বৰ্তমানলৈকে বিদ্যালয় কৰ্তৃপক্ষই পৰিস্থিতি সন্দৰ্ভত কোনো আনুষ্ঠানিক মন্তব্য কৰা নাই।