দুই কন্যাৰ সৈতে দিখৌত জাপ দিলে মাতৃয়ে; মৃত অৱস্থাত উদ্ধাৰ দুই কন্যাক

আজি পুৱা শিৱসাগৰৰ নাজিৰাত সংঘটিত হৈছে এক হৃদয় বিদাৰক ঘটনা। দিখৌৰ বুকুত দুই কন্যা সন্তানৰ সৈতে জাপ দিয়ে এগৰাকী মহিলাই।

সংকটজনক অৱস্থাত মহিলা গৰাকীক উদ্ধাৰ কৰা হয় যদিও মৃত অৱস্থাত উদ্ধাৰ কৰা হৈছে এগৰাকী কন্যাক। পৰৱৰ্তী সময়ত এচডিআৰএফে উদ্ধাৰ কৰে আনগৰাকী কন্যাৰ মৃতদেহ।

সংকটজনক অৱস্থাত উদ্ধাৰ হোৱা মাতৃগৰাকীৰ নাম পুষ্পাঞ্জলী গগৈ আৰু উদ্ধাৰ হোৱা মৃত কন্যা সন্তানৰ নাম পংখী গগৈ আৰু  প্ৰিয়াংক্ষী গগৈ।

নাজিৰা চকীমুখ হালোৱা গাঁৱৰ নিবাসী ৰাজীৱ গগৈৰ পত্নী আছিল পুস্পাঞ্জলী গগৈ। দিন হাজিৰা কৰি পৰিয়াল পোহপাল দি আছিল মহিলাগৰাকীৰ স্বামীয়ে। পুৱা কন্যাক স্কুলত থবলৈ ঘৰৰ পৰা ওলাই আহিছিল মহিলাগৰাকীয়ে।

দুগৰাকী সন্তানক লৈ মাতৃয়ে কিয় এইদৰে নাজিৰাৰ দিখৌ নৈৰ বুকুত জাপ দিলে ইয়াকে লৈ সমগ্ৰ নাজিৰাত এতিয়া চাঞ্চল্যৰ সৃষ্টি হৈছে।

ইফালে মহিলাগৰাকী বহু কেইটা আত্ম সহায়ক গোটৰ লগত জড়িত আছিল বুলিও পৰিয়ালৰ লোকৰ পৰা জানিব পৰা গৈছে।