বিবাহস্থলীৰ পৰা উভতি অহাৰ পথত ওদালগুৰিত নিশা ভয়ংকৰ পথ দুৰ্ঘটনা; নিহত পাঁচ গৰাকী লোক

ওদালগুৰি জিলাৰ পানেৰী আৰক্ষী চকীৰ অন্তৰ্গত নাচনশালীত শুকুৰবাৰে নিশা সংঘটিত হোৱা এক শোকাৱহ পথ দুৰ্ঘটনাত ৫ গৰাকী লোকৰ মৃত্যু হোৱাৰ লগতে ভালেকেইগৰাকী লোক গুৰুতৰভাৱে আঘাতপ্ৰাপ্ত হয়।

এখন তীব্ৰবেগী ডিআই বাহনে নিয়ন্ত্ৰণ হেৰুৱাই পথৰ দাঁতিত থকা গছত খুন্দা মৰাৰ ফলতে শোকাৱহ পথ দুৰ্ঘটনাটো সংঘটিত হয়।

দুৰ্ঘটনাৰ ফলত মৃত্যু হোৱা লোক কেইগৰাকী হ’ল ক্ৰমে- গোবিন্দ বড়ো (৩৫), জ’হান কুলু (৪০), মনিৰাম বড়ো (৩০), জিতেন বড়ো আৰু চানঞ্চুমা ব্ৰহ্ম (১৭)।

কইনা ঘৰৰ পৰা উভতি অহাৰ পথত দুৰ্ঘটনাত পতিত হোৱা বাহনখনৰ পঞ্জীয়ন নম্বৰ হ’ল এএছ-২৫চিচি ৭৬১৯।

আনহাতে, দুৰ্ঘটনাত আঘাতপ্ৰাপ্ত লোক সকলক মঙলদৈ অসামৰিক চিকিৎসালয়ত ভৰ্তি কৰোৱা হয় আৰু গুৰুতৰভাৱে আঘাতপ্ৰাপ্ত লোকসকলক পৰৱৰ্তী সময়ত উন্নত চিকিৎসাৰ বাবে গুৱাহাটী চিকিৎসা মহাবিদ্যালয়লৈ প্ৰেৰণ কৰা হয়।

শোকাৱহ দুৰ্ঘটনাটোৱে সমগ্ৰ অঞ্চলটোৰ জনসাধাৰণৰ মাজত শোকৰ ছাঁ পেলাইছে।