নিৰ্বাচনৰ পূৰ্বে যোৰহাটত বিস্ফোৰণ; পিতৃ আৰু শিশুপুত্ৰ নিহত, গুৰুতৰভাৱে আহত শিশুকন্যা

যোৰহাট জিলাৰ ৰাজামৈদাম নিউ কলনীৰ এটা ভাড়াঘৰত সংঘটিত হোৱা শক্তিশালী বিস্ফোৰণত দুজনৰ মৃত্যু হৈছে। মৃত দুজনক মহম্মদ ইকবাল আৰু নূৰ মহম্মদ বুলি চিনাক্ত কৰা হৈছে। এই বিস্ফোৰণত আন এজন গুৰুতৰভাৱে আহত হৈছে। এই ঘটনাৰ ফলত অঞ্চলটোত আতংকই বিৰাজ কৰিছে।

বাতৰি অনুসৰি, ভাড়াঘৰৰ ভিতৰত সংঘটিত হোৱা এই বিস্ফোৰণত নূৰ মহম্মদ থিতাতে নিহত হয়। বিস্ফোৰণৰ প্ৰভাৱ ইমানেই ভয়াৱহ আছিল যে ভুক্তভোগীৰ মৃতদেহ ছিন্নভিন্ন হৈ পৰিছিল।

এই ঘটনাত মৃত লোকজনৰ দুই সন্তান-এজন আঠ বছৰীয়া পুত্ৰ মহম্মদ ইকবাল আৰু এগৰাকী সাত বছৰীয়া কন্যা গুৰুতৰভাৱে আহত হয় আৰু ততাতৈয়াকৈ তেওঁলোকক চিকিৎসাৰ বাবে যোৰহাট চিকিৎসা মহাবিদ্যালয় হাস্পাতাললৈ প্ৰেৰণ কৰা হয়। কিন্তু পিছত আঠ বছৰীয়া ল’ৰাটোৱে চিকিৎসাৰ সময়তে আঘাতপ্ৰাপ্ত অৱস্থাত মৃত্যুক সাৱটি লয়। সাত বছৰীয়া ছোৱালীজনীৰ অৱস্থা সংকটজনক বুলি জানিব পৰা গৈছে।

ঘটনাৰ পিছতে আৰক্ষীৰ দল ঘটনাস্থলীত উপস্থিত হৈ তদন্ত আৰম্ভ কৰিছে। বিস্ফোৰণৰ সঠিক কাৰণ এতিয়াও জানিব পৰা হোৱা নাই।

এই ঘটনাই স্থানীয় অঞ্চলটোত ভয় আৰু উত্তেজনাৰ পৰিৱেশৰ সৃষ্টি কৰিছে। কৰ্তৃপক্ষই বিস্ফোৰণৰ কাৰণ উদ্ঘাটনৰ বাবে তদন্ত অব্যাহত ৰাখিছে।