উজলি উঠিব আকাশ! প্ৰায় ২৪ ঘণ্টা ধৰি উল্কাবৃষ্টিৰ সাক্ষী হ’ব পৃথিৱী; ভাৰতৰ পৰা দেখা যাবনে?

২৯-৩০ জুলাইৰ নিশা আকাশত দেখা যাব এক মহাজাগতিক দৃশ্য। ‘লাইভ চাইন্স’ৰ এক প্ৰতিবেদন অনুসৰি সেই দুদিনত অন্ধকাৰ আকাশত প্ৰতি ঘণ্টাত প্ৰায় ২৫টাকৈ উল্কাপাত হ’ব। এই উল্কাবৃষ্টি ক’ত হ’ব? ভাৰতৰ পৰা দেখা যাবনে?

১৮ জুলাইৰ পৰা ১২ আগষ্টলৈকে প্ৰতি বছৰে উল্কাবৃষ্টি হয়। ইয়াৰ আঁৰত আছে ‘ছাউদাৰ্ন ডেল্টা একুৱাৰিডছ’। এই ‘ছাউদাৰ্ন ডেল্টা একুৱাৰিডছ’ আচলতে ৯৬পি/মাচকলজ ধুমকেতুৰ অংশ। এই ধুমকেতুটোৱে প্ৰতি ৫.৩ বছৰৰ মূৰে মূৰে এবাৰ সূৰ্য্যক প্ৰদক্ষিণ কৰে। সেই প্ৰদক্ষিণৰ সময়ত ই বহুকেইটা খণ্ড নিজৰ কক্ষপথত পেলাই যায়। সেই খণ্ডবোৰ উল্কাপিণ্ড হিচাপে পৃথিৱীত সৰি পৰে।

জ্যোতিৰ্বিজ্ঞানীসকলৰ মতে ‘ছাউদাৰ্ন ডেল্টা একুৱাৰিডছ’ৰ লগতে এই বছৰ ‘আলফা কেপ্ৰিকৰ্ণিডছ’ উল্কাবৃষ্টিও সক্ৰিয় হ’ব। মুঠতে সকলো মিলি প্ৰতি ঘণ্টাত গড়ে ২৫টা উল্কাপাত হ’ব পাৰে।

গৱেষকসকলে কয় যে এই উল্কাবৃষ্টি উত্তৰ আৰু দক্ষিণ দুয়োটা গোলাৰ্ধৰ পৰা দেখা যাব। যিহেতু দক্ষিণ গোলাৰ্ধত ‘ছাউদাৰ্ন ডেল্টা একুৱাৰিডছ’ আকাশৰ ওচৰত, সেই অঞ্চলত ইয়াক অলপ ভালকৈ দেখা যাব। ভাৰত উত্তৰ গোলাৰ্ধত অৱস্থিত। ভাৰতৰ সকলো প্ৰান্তৰ পৰা উল্কাবৃষ্টি দেখা পোৱাৰ সম্ভাৱনা আছে।

জ্যোতিৰ্বিজ্ঞানীসকলে কয় যে উত্তৰ গোলাৰ্ধত বাস কৰাসকলে ৩০ জুলাই বুধবাৰে পুৱা পোহৰ হোৱাৰ আগতেই দক্ষিণ আকাশৰ ওপৰত চকু ৰাখিলে এই উল্কাবৃষ্টি ভালদৰে চাব পাৰিব। আকাশৰ পৰা যেন পোহৰৰ ফুল সৰি পৰিব!