অত্যধিক নিষিদ্ধ ড্ৰাগছৰ বলি! আড়ম্বৰপূৰ্ণ ‘মিউজিক কনচাৰ্ট’ত দুই এম বি এ শিক্ষাৰ্থীৰ মৃত্যু
নিষিদ্ধ ড্ৰাগছৰ অতিমাত্ৰা সেৱন কৰি মৃত্যু হৈছে দুই এম বি এ শিক্ষাৰ্থীৰ! নিষিদ্ধ ড্ৰাগছ অত্যধিক সেৱনৰ বাবেই মৃত্যু হোৱা বুলি দাবী কৰিছে আৰক্ষীয়ে!
যোৱা ১১ এপ্ৰিলত মুম্বাইৰ গোৰেগাঁৱৰ নেস্কো চেণ্টাৰত এক বৃহৎ আড়ম্বৰপূৰ্ণ ‘সংগীত কনচাৰ্ট’ অনুষ্ঠিত হয়। য’ত সমবেত হৈছিল ৪ হাজাৰ লোক। দুই হাজাৰ টকাৰ টিকট দি এই অনুষ্ঠানলৈ আহিছিল দুগৰাকী ছাত্ৰ-ছাত্ৰীও।
আৰক্ষীৰ সূত্ৰ অনুসৰি, নিষিদ্ধ ড্ৰাগছ এমডিএমএ সেৱন কৰি তেওঁলোক গুৰুতৰভাৱে অসুস্থ হৈ পৰে। তাৰপিছত উদ্ধাৰ কৰি চিকিৎসালয়লৈ লৈ যোৱাত এম বি এৰ শিক্ষাৰ্থী দুগৰাকীৰ মৃত্যু হয়।
অনুষ্ঠানৰ সময়ত মাজনিশাৰ ভাগত শিক্ষাৰ্থীসকলৰ উশাহ-নিশাহৰ সমস্যা হ’বলৈ আৰম্ভ কৰে। ততাতৈয়াকৈ অসুস্থ ২৪ বছৰীয়া যুৱতীগৰাকী আৰু ২৮ বছৰীয়া যুৱকজনক স্থানীয় চিকিৎসালয়লৈ প্ৰেৰণ কৰা হয়। তাতেই তেওঁলোকৰ মৃত্যু হয়। সংকটজনক অৱস্থাত চিকিৎসাধীন হৈ আছে আন এগৰাকী ২৫ বছৰীয়া যুৱতী। অনুমান কৰা হৈছে যে তেওঁৱো নিষিদ্ধ ড্ৰাগছ সেৱন কৰিছিল।
আৰক্ষীৰ মতে, সংগীত কনচাৰ্টলৈ যোৱাৰ পথত প্ৰথমবাৰৰ বাবে টেক্সিত নিষিদ্ধ ড্ৰাগছ এমডিএমএ টেবলেট লৈছিল শিক্ষাৰ্থীসকলে। ইয়াৰ পিছতে অনুষ্ঠাস্থলীত উপস্থিত হোৱাৰ পিছত আন এটা টেবলেট লৈছিল। ইয়াৰ ফলত ‘অভাৰড’জ’ৰ প্ৰভাৱ ঘটে। ফলত দুগৰাকী ছাত্ৰ-ছাত্ৰী অসুস্থ হৈ মৃত্যুমুখত পৰে।
ছাত্ৰ-ছাত্ৰীক ড্ৰাগছ বিক্ৰী কৰাৰ অভিযোগত আৰক্ষীয়ে গ্ৰেপ্তাৰ কৰিছে এজন লোকক। তেওঁৰ পৰা উদ্ধাৰ হৈছে কেইবাটাও নিষিদ্ধ ড্ৰাগছ টেবলেট। তদন্তৰ সূত্ৰ অনুসৰি মুম্বাইৰ বাহিৰৰ পৰা আমদানি কৰা হৈছিল এই ড্ৰাগছ।
তেওঁৰ লগতে এই ঘটনাত গ্ৰেপ্তাৰ হৈছে অনুষ্ঠানৰ আয়োজক বিহান ওৰফে আকাশ সামাল, নেস্কো ইভেণ্ট অৰ্গেনাইজেচন এণ্ড মেনেজমেণ্টৰ ছানী বিনোদ জৈন, নিৰাপত্তাৰ দায়িত্বত থকা বালকৃষ্ণন বলৰাম আৰু আন দুজন ছাত্ৰ। নেস্কোৱে এক বিবৃতিত কয় যে তেওঁলোকে আৰক্ষীক তদন্তত সহায় কৰি আছে।