শিৱসাগৰৰ দিচাংমুখত চাঞ্চল্য : নিশা দুটাকৈ বন্যহস্তীৰ ৰহস্যজনক মৃত্যু
শিৱসাগৰৰ দিচাংমুখত শোকাৱহ ঘটনা। যোৱা নিশা দুটাকৈ বন্যহস্তীৰ মৃত্যু হৈছে।
শিৱসাগৰৰ দিচাংমুখৰ লেপাই গাঁৱত সংঘটিত হৈছে ঘটনাটো।
যোৱা নিশা বন্যহস্তীৰ বৃহৎ জাক এটাই অঞ্চলটোত প্ৰৱেশ কৰি বিঘাই বিঘাই ৰবি শস্যৰ খেতি তহিলং কৰিছিল।
ইয়াৰ পিছতে পুৱা গাঁৱৰ ৰাইজে অঞ্চলটোত দুটা বন্যহস্তীৰ মৃতদেহ প্ৰত্যক্ষ কৰে।
অৱশ্যে কেনেদৰে হাতী দুটাৰ দুটাৰ মৃত্যু হল সেয়া এতিয়াও স্পষ্ট নহয় যদিও ৰবি শস্যত বিষাক্ত সাৰ সেৱন কৰাৰ ফলতেই হাতী দুটাৰ মৃত্যু হোৱা বুলি সন্দেহ কৰা হৈছে।
ইপিনে বন বিভাগৰ গাফিলতিৰ বাবে এইদৰে দুটাকৈ বন্যহস্তীৰ মৃত্যু হোৱা বুলি স্থানীয় ৰাইজে অভিযোগ কৰিছে।
স্থানীয় ৰাইজ আৰু গাঁওৰক্ষী বাহিনীয়ে বন বিভাগক বাৰম্বাৰ ফোন কৰি হাতীজাকটোৰ বিষয়ে অৱগত কৰিছিল যদিও ৰাতি বনবিভাগৰ কোনো লোক উপস্থিত নহ’ল বুলি গঞাই অভিযোগ কৰিছে।
অৱশ্যে হাতী দুটাৰ মৃত্যুৰ খবৰ পোৱাৰ পিছত ঘটনাস্থলীত বন বিভাগৰ লগতে পশু চিকিৎসকৰ দল এটা উপস্থিত হৈ তদন্ত অৱ্যাহত ৰাখিছে।
ইপিনে বন বিভাগে জনোৱা মতে কোনো লোকে অবৈধ ভাৱে বিদ্যুৎ সংযোগ কৰাৰ ফলত বিদ্যুৎস্পৃষ্ট হৈ হাতী দুটাৰ মৃত্যু হোৱাৰ তথ্য পোৱা বুলি সাংবাদিকক জানিবলৈ দিয়ে।
উল্লেখ্য যে বছৰ বছৰ ধৰি অঞ্চলটোত খাদ্যৰ সন্ধানত বনৰীয়া হাতীয়ে উপদ্ৰপ চলাই আহিছে যদিও স্থানীয় প্ৰশাসন তথা বনবিভাগে কোনো স্থায়ী সমাধান কৰিবলৈ সক্ষম হোৱা নাই।