চীনৰে বিবাদঃ টাইৱান ষ্ট্ৰেইটলৈ যুদ্ধ জাহাজ প্ৰেৰণ কৰিলে আমেৰিকাই

টাইৱানকলৈ চীন আৰু আমেৰিকাৰ মাজত সৃষ্টি হোৱা উত্তেজনাৰ উপশম ঘটা নাই৷ অনে উত্তেজনাৰ মাজতে চীনে টাইৱানৰ চাৰিওফালে সাগৰত সামৰিক অনুশীলন চলাই আছে। বেইজিঙে টাইৱান ষ্ট্ৰেইটৰ মাজেৰে আন দেশৰ জাহাজৰ চলাচল নিষিদ্ধ কৰিছে। আমেৰিকা যুক্তৰাষ্ট্ৰৰ নৌসেনাই দেওবাৰে টাইৱান ষ্ট্ৰেইটলৈ দুখন যুদ্ধজাহাজ প্ৰেৰণ কৰে।

ৱাশ্বিংটনে টাইৱান ষ্ট্ৰেইটলৈ যুদ্ধ জাহাজ প্ৰেৰণ কৰি চীনক এক কঠোৰ বাৰ্তা দিব বিচাৰিছে বুলি বহুতে আলোচনা কৰিছে । জানিব পৰা মতে টাইৱান ষ্ট্ৰেইটলৈ যুদ্ধ জাহাজ প্ৰেৰণ কৰা আমেৰিকাৰ মুখ্য উদ্দেশ্য হৈছে প্ৰশান্ত মহাসাগৰীয় অঞ্চলক চীনৰ দখলৰ পৰা মুক্ত কৰা। একে সময়তে আমেৰিকা যুক্তৰাষ্ট্ৰৰ নৌসেনা প্ৰধানে কৈছে যে চীনক বাধা দিয়াত ভাৰতে এক গুৰুত্বপূৰ্ণ ভূমিকা পালন কৰিব পাৰে।

আমেৰিকা যুক্তৰাষ্ট্ৰৰ নৌসেনাই দাবী কৰিছে যে যুদ্ধজাহাজ দুখন ‘নিয়মীয়া’ অনুশীলনৰ অংশ হিচাবেহে প্ৰেৰণ কৰা হৈছে। টাইৱান ষ্ট্ৰেইট (টাইৱান)ত আন্তৰ্জাতিক আইন অনুসৰি জাহাজখন পঠিওৱা হৈছে বুলিও আমেৰিকাই কৈছে৷ মাৰ্কিন নৌসেনাই কয় যে দেশ খনৰ এই যুদ্ধজাহাজবোৰে কোনো স্বাধীন দেশৰ জলসীমাত প্ৰৱেশ কৰা নাই। দেওবাৰে এক বিবৃতিত আমেৰিকা যুক্তৰাষ্ট্ৰৰ নৌসেনাই কয়, “এণ্টিটুম আৰু চাঞ্চেলৰচভিল নামৰ দুখন যুদ্ধ জাহাজে টাইৱান ষ্ট্ৰেইটলৈ গৈছে । আন্তৰ্জাতিক জলপথ অনুসৰণ কৰি যুদ্ধজাহাজ দুখন পৰিচালনা কৰা হৈছে। আন্তৰ্জাতিক আইন অনুসৰি আমি জাহাজ দুখন চলাই আছো। “

আনহাতে, আমেৰিকা যুক্তৰাষ্ট্ৰৰ নৌসেনাৰ মুৰব্বী মাইক গিল্ডে এক বৈঠকত কয় যে চীনক বাধা দিবলৈ ভাৰত আমেৰিকাৰ সহযোগী হ’ব পাৰে। শনিবাৰে এক অনুষ্ঠানত ভাষণ দি গিল্ডে কয়, “মই ভাৰততে বিদেশ ভ্ৰমণৰ ক্ষেত্ৰত আটাইতকৈ বেছি সময় অতিবাহিত কৰিছো। মই ভাবো যে ভৱিষ্যতে আমেৰিকাৰ সৈতে ভাৰতৰ কৌশলগত সম্পৰ্ক এক অতি গুৰুত্বপূৰ্ণ স্থানত উপনীত হ’ব। চীনক বাধা দিয়াত ভাৰতৰ ভূমিকাও অতি উপযোগী হ’ব। “

টাইৱান ষ্ট্ৰেইট আৰু দক্ষিণ চীন সাগৰত চীন বিৰোধী দেশসমূহে জাহাজৰ চলাচল বৃদ্ধি কৰিছে। সেই আন্তৰ্জাতিক জলপথৰ ওপৰত কাৰো অধিকাৰ নাই। সকলো দেশে তালৈ জাহাজ প্ৰেৰণ কৰিব পাৰে। বিশেষজ্ঞসকলে কৈছে আমেৰিকাৰ শেহতীয়া পদক্ষেপে চীনৰ ক্ষোভ বৃদ্ধি কৰিব। আমেৰিকা যুক্তৰাষ্ট্ৰৰ সংসদৰ অধ্যক্ষ নেন্সি পেলোচিৰ টাইৱান ভ্ৰমণৰ পিছতে চীন-টাইৱান সম্পৰ্ক ক্ৰমান্বয়ে অৱনমিত হৈছিল। চীনে অভিযোগ কৰি আহিছে যে আমেৰিকাই চীনৰ সাৰ্বভৌমত্বত আঘাত কৰিছে।