কিমান দূৰ আগবাঢ়িছে জুবিন গাৰ্গৰ মৃত্যুৰ তদন্ত্ৰ! কি প্ৰতিশ্ৰুতি দিলে ডি জি পি হৰমীত সিঙে

অসমবাসীৰ প্ৰিয় শিল্পী জুবিন গাৰ্গৰ আদ্যশ্ৰাদ্ধ উপলক্ষে সোমবাৰে কাহিলিপাৰাস্থিত তেওঁৰ বাসগৃহত উপস্থিত হৈছিল অসম আৰক্ষীৰ সঞ্চালক প্ৰধান (ডি জি পি) হৰমীত সিং। শিল্পীগৰাকীৰ পৰিয়ালৰ সৈতে সাক্ষাৎ কৰি সংবাদ মাধ্যমৰ আগত তেওঁ মৃত্যুৰ তদন্ত সম্পৰ্কে গুৰুত্বপূৰ্ণ মন্তব্য কৰে।

ডি জি পি সিঙে স্পষ্টকৈ কয়, “জুবিন গাৰ্গৰ মৃত্যুৰ গোচৰত যিবিলাক তথ্য আহিছে, সেই সকলো তথ্য আদালতলৈ প্ৰেৰণ কৰা হ’ব। ৰাইজৰ মাজত এতিয়া তথ্য প্ৰচাৰ কৰাটো আইনৰ দৃষ্টিতে অসম্ভৱ। তথাপিও SIT আৰু CID পৰ্যায়ক্রমে তথ্য জনসাধাৰণক অবগত কৰিব।”

তদন্ত সন্দৰ্ভত তেওঁ আশ্বাস প্ৰদান কৰি তেওঁ কয়, “মুখ্যমন্ত্ৰীৰ নিৰ্দেশ অনুসৰি সম্পূৰ্ণ নিকা আৰু বৈজ্ঞানিক তদন্ত চলিব। ইতিমধ্যে SITৰ এটা দল দিল্লীত তদন্তত ব্যস্ত, আৰু দুজন সদস্য শীঘ্ৰেই ছিংগাপুৰলৈ গৈ তদন্ত আগবঢ়াই নিব। ছিংগাপুৰ চৰকাৰৰ লগত ভাৰতীয় চৰকাৰৰ সম্পূৰ্ণ যোগাযোগ আছে, আমি সহায় লাভ কৰিম।”

শ্যামকানু মহন্ত আৰু সিদ্ধাৰ্থ শৰ্মাৰ নামত উত্থাপিত অভিযোগ সন্দৰ্ভত তেওঁ উল্লেখ কৰে যে “উৰাবাতৰি প্ৰচাৰ কৰি লাভ নাই। SIT-এ সকলো তথ্য নিজে পৰীক্ষা কৰিব। সিদ্ধাৰ্থ আৰু শ্যামকানুক ইতিমধ্যে জাননী দিয়া হৈছে। তেওঁলোকে হাজিৰ নহ’লে পৰৱৰ্তী আইনী পদক্ষেপ গ্ৰহণ কৰা হ’ব।”

ডি জি পি সিঙে ৰাইজক আশ্বাস দিয়ে, “কিছুমান ব্যক্তি উৰাবাতৰি চলাইছে। কোনোবাই কৈছে তেওঁ অমুক ঠাইত আছে, কোনোবাই কৈছে অন্য ঠাইত আছে। এই ধৰণৰ কথাৰ দ্বাৰা বিভ্ৰান্ত নহ’ব। অসম আৰক্ষীক বিশ্বাস কৰক, চৰকাৰক বিশ্বাস কৰক। মই প্ৰতিশ্ৰুতি দিছোঁ, জুবিন গাৰ্গৰ মৃত্যুৰ আঁৰৰ সকলো কথা পোহৰলৈ আহিব।”