‘মুম্বাইক গিলি পেলাব’, অমিত শ্বাহক ‘এনাকোণ্ডা’ৰ সৈতে তুলনা শিৱসেনাৰ মুৰব্বী উদ্ধৱ থাকৰেৰ

শিৱসেনাৰ মুৰব্বী উদ্ধৱ থাকৰেই কেন্দ্ৰীয় গৃহমন্ত্ৰী অমিত শ্বাহক ভয়াৱহ এনাকোণ্ডা সাপৰ সৈতে তুলনা কৰে। তেওঁ অভিযোগ কৰে যে শ্বাহে এনাকোণ্ডা সাপৰ দৰে মুম্বাইক মেৰিয়াই ধৰি গিলি পেলাব বিচাৰিছে। স্বাভাৱিকতে থাকৰেৰ এই মন্তব্য পোহৰলৈ অহাৰ পাছতে বিতৰ্কৰ সৃষ্টি হৈছে।

উদ্ধৱ থাকেৰই সোমবাৰে শিৱসেনাৰ মুখপত্ৰ সমনাত প্ৰকাশিত দুটা প্ৰতিবেদন তুলি ধৰে। ইয়াৰে প্ৰথমটো আছিল বিজেপিয়ে কেনেকৈ বিদ্যুৎ গতিৰে মাটি দখল কৰি নতুন কাৰ্যালয় নিৰ্মাণ কৰিছে। আৰু দ্বিতীয়টো ৰিপৰ্ট আছিল মুম্বাইৰ জিজামাটা পাৰ্কত নতুনকৈ অনা এনাকোণ্ডাৰ বিষয়ে।

থাকৰেই এই দুটাক একত্ৰিত কৰি অমিত শ্বাহক এনাকোণ্ডা সাপৰ লগত তুলনা কৰে। তেওঁ কয়, “এনাকোণ্ডাই নিজৰ বাটত অহা সকলো বস্তু যিদৰে গিলি পেলায়, তেওঁলোকে মুম্বাইকো একেদৰেই গিলিব বিচাৰে।”

কেৱল সেয়াই নহয়, তেওঁ এই বিজেপি নেতাসকলক আফগান আক্ৰমণকাৰী আহমেদ শ্বাহ আব্দালীৰ সৈতে তুলনা কৰে। তেওঁ কয়, “আচল আব্দালী আকৌ ঘূৰি আহিছে। এইবাৰ দিল্লী আৰু গুজৰাটৰ পৰা। যদি তেওঁলোকে আমাৰ চহৰবোৰ দখল কৰিবলৈ চেষ্টা কৰে তেন্তে তেওঁলোকৰ কবৰ আমাৰ মাটিত নিৰ্মাণ হ’ব।”

তাতেই ক্ষান্ত নহয়, উদ্ধৱে পুনৰ বিজেপিৰ বিৰুদ্ধে ভোট ৰিগিঙৰ অভিযোগ উত্থাপন কৰে। তেওঁ কটাক্ষ কৰি কয় যে গণতন্ত্ৰত ভোটাৰে চৰকাৰ নিৰ্বাচন কৰে, কিন্তু আজি চৰকাৰে ভোটাৰক নিৰ্বাচন কৰি আছে।

এই বিষয়ত সৰৱ থাকৰেই কয়, “ভুৱা ভোটাৰৰ অপব্যৱহাৰৰ বাবে নিৰ্বাচন আয়ুক্তৰ বিৰুদ্ধে গোচৰ ৰুজু কৰিব লাগে”। আয়োগক সকীয়াই দি থাকৰেই কয় যে “লোকসভা নিৰ্বাচনত জয়ী হোৱাৰ পিছত আমি কেন্দ্ৰত চৰকাৰ গঠন কৰাৰ পিছত নিৰ্বাচন আয়ুক্তসকলৰ বিৰুদ্ধে গোচৰ ৰুজু কৰিম আৰু তেওঁলোকক কাঠগড়াত তুলিম।“

বিজেপিৰ আত্মনিৰ্ভৰ ভাৰতৰ শ্লোগানক নকল বুলি অভিহিত কৰি মহাৰাষ্ট্ৰৰ প্ৰাক্তন মুখ্যমন্ত্ৰী থাকৰেই কয়, “বিজেপিয়ে আত্মনিৰ্ভৰ ভাৰতৰ আহ্বান জনাইছিল, কিন্তু তেওঁলোকে এতিয়াও আত্মনিৰ্ভৰশীল বিজেপি হ’ব পৰা নাই। কাৰণ তেওঁলোকে দল ভাঙে আৰু ভোট চুৰি কৰে। বিজেপি স্বঘোষিত দেশপ্ৰেমিকৰ এটা ভুৱা ৰাজনৈতিক দল।”