পাৰমাণৱিক আক্ৰমণৰ ভাবুকি: অৱশেষত ৰাছিয়াৰে আলোচনাৰ বাবে সন্মত হ’ল ইউক্ৰেইন

মৃত্যু উপত্যকাত পৰিণত হোৱা ইউক্ৰেইনলৈ হয়তো শীঘ্ৰে শান্তি ঘূৰি আহিব। আপাততঃ তেনে এক আশাৰ ৰেঙণিয়েই এতিয়া দেখিবলৈ পোৱা গৈছে।

ৰাছিয়াৰ ৰাষ্ট্ৰপতি পুটিনে পাৰমাণৱিক অস্ত্ৰ প্ৰয়োগৰ ইংগিত দিয়াৰ পিছতে ইউক্ৰেইনে ৰাছিয়াৰ সৈতে আলোচনা কৰাৰ বাবে সন্মতি প্ৰকাশ কৰিছে।

ইউক্ৰেইনৰ ৰাষ্ট্ৰপতিৰ কাৰ্যালয়ে শেহতীয়াকৈ প্ৰকাশ কৰা মতে বেলাৰুছৰ সীমান্তত ইউক্ৰেইনৰ প্ৰতিনিধিয়ে ৰাছিয়াৰ সৈতে আলোচনা কৰিবলৈ সাজু আছে।

বেলাৰুছৰ সীমান্তৰ চেৰনোবিলত আলোচনা অনুষ্ঠিত হ’ব বুলি ৰাষ্ট্ৰপতিৰ কাৰ্যালয়ে প্ৰকাশ কৰিছে। অৱশ্যে আলোচনাৰ সময়ৰ বিষয়ে এই মুহূৰ্তলৈ কোনো কথা উল্লেখ কৰা হোৱা নাই।

উল্লেখ্য ৰাছিয়াৰ ৰাষ্ট্ৰপতি পুটিনে দেশখনৰ সেনাক ইউক্ৰেইনৰ বিৰুদ্ধে পাৰমাণৱিক অস্ত্ৰ ব্যৱহাৰ কৰিবলৈ সাজু থকাৰ নিৰ্দেশ দিছিল।

পুটিনৰ এনে নিৰ্দেশৰ পিছতে ইউক্ৰেইনে আলোচনা কৰিবলৈ সন্মত হয়।

ইউক্ৰেইনৰ ৰাষ্ট্ৰপতি ভলোডিমিৰ জেলেনস্কিয়ে বেলাৰুছৰ ৰাষ্ট্ৰপতিৰ সৈতে ফোনত কথা পাতি ইউক্ৰেইন-বেলাৰুছ সীমান্তত ৰাছিয়াৰ সৈতে কোনো পূৰ্বচৰ্ত নোহোৱাকৈ আলোচনা কৰিব বুলি কথা দিয়ে।

পূৰ্বে ৰাছিয়াৰ বৈদেশিক মন্ত্ৰী ছেৰ্গেই লাভৰভে কৈছিল যে ইউক্ৰেইনৰ সৈতে তেতিয়াহে আলোচনা কৰা হ’ব যেতিয়া ইউক্ৰেইনৰ সেনাই অস্ত্ৰ সম্বৰণ কৰি আত্মসমৰ্পন কৰিব।

ৰাছিয়াই আনকি ইউক্ৰেইনৰ সৈতে চৰ্তসাপেক্ষ আলোচনা কৰিবলৈ বেলাৰুছৰ গোমেল চহৰলৈ দেশ খনৰ প্ৰতিনিধিও প্ৰেৰণ কৰিছিল। কিন্তু ইউক্ৰেইনে ৰাছিয়াৰ আলোচনাৰ প্ৰস্তাৱ সেই সময়ত নাকচ কৰিছিল।